Ҳегсет НАТОдан Украина учун кўпроқ АҚШ қуролларини сотиб олишни сўради (видео)

АҚШ ўзининг НАТОдаги иттифоқчиларидан Украинани қуроллантириш учун Америка қурол-аслаҳаларини кўпроқ харид қилишини кутмоқда. Бу ҳақда бугун, 15 октябрь куни мамлакат Уруш вазири Пит Ҳегсет Брюсселда ўтаётган НАТО Мудофаа вазирлари йиғилиши олдидан маълум қилди.

У АҚШ Президенти Дональд Трамп маъмурияти даврида бошланган “Украинанинг устувор эҳтиёжлари рўйхати” (Prioritized Ukraine Requirements List, қисқача PURL) ташаббуси ҳақида сўз юритган. Ушбу дастурга мувофиқ, АҚШ Украинага қуролни тўғридан тўғри етказмайди, балки уни ўз иттифоқчиларига сотади, улар эса қуролларни Киевга топширади.

Пентагон раҳбарининг сўзларига кўра, Украинага қурол етказиб беришни кўпайтириш тинчликка эришиш учун зарур.

“Агар биз Трамп давридан бирор нарса ўрганган бўлсак, бу “куч орқали тинчлик” тамойилининг амалда қўлланилишидир. Тинчлик фақат кучли бўлган пайтингда эришилади. Бу шунчаки баландпарвоз сўзлар ёки айбловлар билан эмас, балки ҳурмат уйғотадиган ҳақиқий ва қудратли имкониятларга эга бўлиш билан таъминланади”, дейди Ҳегсет.

НАТО Бош котиби Марк Рютте эса Брюсселдаги “Рамштейн” форматидаги учрашувда PURL ташаббусига янги давлатлар қўшилишини эълон қилиш режалаштирилаётганини маълум қилган. Мазкур дастур доирасида Украинага қурол етказиб бериш учун ҳозиргача қарийб 2 миллиард доллар ажратилган.

Кутилишича, жорий йилнинг 17 октябрь куни Трамп Украина Президенти Владимир Зеленский билан учрашади. Учрашув мавзуси Украинанинг ҳаво мудофаасини кучайтириш ҳамда узоқ масофали қуролларни етказиб бериш бўлади. АҚШ Президенти Украина учун узоқ масофали Tomahawk қанотли ракеталарини топшириш эҳтимолини истисно қилмаган. Шу билан бирга, Трампнинг айтишича, у Украинанинг бу ракеталарни қандай ишлатишини билмоқчи ва Россия Президенти Владимир Путин билан суҳбатлашиб, агар Россия урушни тинч йўл билан ҳал этишга рози бўлмаса, АҚШ Киевга Tomahawk ракеталарини бериши мумкинлигини айтмоқчи.

Эслатиб ўтамиз, аввалроқ “Financial Times” Қўшма Штатлар Украинага 20 дан 50 тагача қанотли Tomahawk ракеталарини тақдим этиши мумкинлиги ҳақида хабар берган эди. Америка хавфсизлиги маркази мудофаа бўйича директори Стейси Петтижоннинг фикрича, “бу уруш динамикасини тубдан ўзгартира олмайди”.