ҲАМАС Ғазо бўйича сулҳ режасига 29 та ўзгартириш киритишга ҳаракат қилди

Фаластиннинг ҲАМАС радикал ҳаракати Ғазо секторидаги вазиятни тартибга солиш учун АҚШ президенти Жо Байден томонидан қўллаб-қувватланган келишув режасига 29 та ўзгартириш киритишни сўраган, Исроил Бош вазири Биньямин Нетаньяху уларнинг барчасини рад этган. Бу ҳақда Исроил ҳукумати раҳбари девонининг маслаҳатчиси Дмитрий Гендельман маълум қилди.

“ҲАМАС Байден тақдим этган режага 29 та ўзгартириш киритишга уринди, Нетаньяху бу ўзгаришларни рад этди”, дейди у.

Унинг қўшимча қилишича, Исроил Президент Байден томонидан қўллаб-қувватланган режадан бир миллиметр ҳам четга чиқмаган.

“Исроил томони бирорта ҳам шартни қўшмаган ёки олиб ташламаган. Исроил ҲАМАСга ҳам режани ўзгартиришга рухсат бермайди”, дейди Гендельман.

Маълумот учун, 31 май куни АҚШ Президенти Жо Байден Ғазода тинчлик ўрнатиш бўйича уч босқичдан иборат янги келишув лойиҳаси шартларини эълон қилди.

Биринчи босқич олти ҳафтага мўлжалланган бўлиб, тўлиқ ўт очишни тўхтатиш, Исроил қўшинларини аҳоли пунктларидан олиб чиқиб кетиш, Исроил қамоқларидан юзлаб фаластинлик маҳбусларни озод қилиш эвазига ҲАМАС томонидан гаровга олинганларни озод этишни назарда тутади. Бу даврда томонлар музокараларни бошлаши керак ва ўзаро келишувга эришилгунга қадар сулҳ ўз кучида қолади.

Иккинчи босқич барча гаровга олинганларни, жумладан, ҳарбий хизматчиларни ҳам озод қилишни назарда тутади.

Учинчи босқичда Ғазо секторини тиклаш ва ҳалок бўлган исроилликларнинг қолдиқларини яқинларига топшириш назарда тутилган.