Ҳаққонийликдан асар ҳам йўқ – UzAuto Motors депутат Кушербоевга жавоб қайтарди

Жамият 26125
image

Аввалроқ, Олий Мажлис Қонунчилик палатаси депутати Расул Кушербоев UzAuto Motors компаниясидан тез ёрдам учун автомобилларни имтиёз билан сотишини сўраб чиққани ҳақида хабар берган эдик.

Депутатнинг билдирган фикрлари юзасидан UzAuto Motors компанияси ўзининг таҳлилий муносабатини билдирди. Унда депутат фаолиятига ҳам эътирозлар билдирилган.

“Жаноб Кушербоев UzAuto Motors COVID-19 пандемияси муносабати билан Ўзбекистонда юзага келган оғир вазиятни эътиборга олмаётир, дея даъво қилади. Бироқ, биз профессионал журналист ўзи айтаётган сўзларининг моҳиятини чуқурроқ англаши, тажрибали парламентарий эса, сўзларининг масъулиятини яхшироқ ҳис қилиши лозим эканлигига аминмиз. Афтидан, депутат учун бу – ўз шахсини бутун тармоққа қарши қўйиш ҳисобига аудитория қамровига осонроқ эришишга қаратилган оддий хабар бўлган. Шундай бўлса-да, ўз сайловчиларига бўлган оддий ҳурмат ҳам уларга текширилган ахборот тақдим этишни назарда тутади. Афсуски, баёнотдаги депутат сўзларида ҳаққонийликдан асар ҳам йўқ.

Нафақат UzAuto Motors, балки компания ходимлари ҳам, ҳамкорлари ҳам пандемиянинг биринчи кунларидан коронавирусга қарши курашда фаол қатнашиб келмоқда. Тўғри, эҳтимол, компания ўзининг хайрия акцияларини кўз-кўз қилмаётгандир, бироқ бу ҳеч бир сиёсатчига тармоқ корхоналарининг ва уларда ишлаётган ўн минглаб ходимларнинг умумий курашга қўшаётган ҳиссаларини камситиш ҳуқуқини бермайди”, дейилади компания муносабатида.

Шундан сўнг, компания сўнгги вақтларда мамлакатда юз берган офатлар оқибатини бартараф қилиш учун ажратган маблағларини эслатиб ўтган.

“Хайрия ишларидаги улушлари ҳақида гапириш компания одатларига кирмайди, аммо Расул Кушербаев ўзининг ҳақоратомуз пости билан уларни ёдга олишга мажбур қилмоқда: “Ўзавтосаноат” АЖ ва унинг тузилмавий бўлинмалари биринчилардан бўлиб “Ўзбекистон меҳр-шафқат ва саломатлик” жамоатчилик фондига 1 миллиард сўмдан зиёд маблағ ўтказди. Бундан ташқари, жорий йил апрель ойида компания республикага хорижий ҳамкорларидан 2 миллиард сўмлик тиббиёт жиҳозларини келтириш ташаббускори бўлди. Яна 2 миллиард сўмга тенг маблағ тармоқ корхоналари томонидан Сардоба сув омбори ёрилиши ва Бухоро вилоятидаги тўфондан зарар кўрганлар фойдасига ўтказилди.

Бундан ташқари, тармоқ томонидан ҳокимият идораларига, карантин муассасаларининг қурилиши учун ЎСВ аппаратлари ва 2500 та контейнер беғараз тақдим этилди. Қолаверса, эпидемиянинг илк кунларида, ҳали махсус карантин марказлари яратилмаган пайтда, “Ўзавтосаноат” АЖ Ҳожикентдаги “Лочин” идоравий соғломлаштириш оромгоҳини юзлаб инсонларни карантинга жойлаш учун тақдим этди ва уларнинг тўлиқ таъминотини зиммасига олди. Мана шулар ва бошқа кўплаб фактлардан кейин ҳам, компания ватандошлар ташвишларига беэътибор, деб даъво қилиш қанчалик тўғри бўлади?”, дея савол қўйган UzAuto Motors.

Компания депутат Damas тез ёрдам автомобили ҳақидаги гапларни нега айтганини тушунмаганини, аммо бундай машиналарни текинга бериб бўлмаслигини айтиб ўтган. Бу фикрга асос сифатида қонундан мисол келтирган. 

“Ҳурматли O‘zLiDeP фракциясининг аъзоси ўзининг “UzAuto Motors” томон оғзаки ҳамласига тасдиқ ўлароқ, жуда қизиқ мисол келтиради – Фарғона вилояти ҳокимлиги 20 дона янги Damas автомобилини харид қилганини айтади. Бу билан жаноб Кушербаев айнан нима демоқчи бўлгани унчалик тушунарли эмас. Агар бу тез ёрдам эҳтиёжлари учун автомобиллар бепул берилиши кераклигига шама бўлса, унга, ҳар қалай, ўтган ҳафтанинг ўзида UzAuto Motors мутлақо бепул асосда Андижон вилояти ҳокимлигига олти дона Damas тез ёрдам автомобилини тақдим этганлигини аниқлаштириш қийинчилик туғдирмаган бўларди. Афтидан, бу ҳақда барча ОАВларда эълон қилинмагани хато бўлган кўринади, лекин компания умумий офат пайтида бундай ишларни кўз-кўз қилишни тўғри деб ҳисобламайди.

Балки, Расул Хидралиевич тез ёрдам эҳтиёжлари учун барча автомобиллар беғараз етказиб берилишини истар? Аммо, Қонунчилик палатасининг ҳурматли депутати илгари сураётган бу ғоя муносабати билан, Ўзбекистон Республикасининг “Ҳомийлик тўғрисида”ги Қонунининг айрим меъёрларини эслатиб ўтишни хоҳлар эдик. Унга кўра, устав фондида давлат улуши 50%дан ортиқ бўлган хўжалик юритувчи жамиятларнинг ҳомийликка йиллик харажатлари ўтган йилда олинган соф фойданинг 10 фоизидан ошмаслиги керак.

Шу муносабат билан, биринчи ярим йилликнинг ўзида хайрия мақсадларига 37 миллиард сўмдан зиёд маблағ йўналтирган, UzAuto Motors минг хоҳламасин, ушбу чегарани босиб ўта олмайди”, дейилади баёнотда.

Кейин эса компания қонунлар депутатлар томонидан ишлаб чиқилишини эслатиб, ўша ўрнатилган тартибга амал қилаётган бўлса ҳам айбдорга чиқаётгинини таъкидлаган.

“Энди савол туғилади: мамлакатимизда қонунларни ким ёзади? UzAuto Motors раҳбариятими ёки, ҳар қалай, Олий Мажлис Қонунчилик палатаси депутатларими? Барчаси сизнинг қўлингизда, ҳамкасбларингиз ихтиёрида, қадрли Кушербоев жаноблари.

UzAuto Motors ўз хайрия фаолиятида сиз ишлаб чиққан қонунларга таянса, сиз жорий қилган чекловлар доирасида иш кўрса, нега энди таъна айнан сиз томондан янграмоқда?

Компания тез ёрдам эҳтиёжларига ўз маҳсулотларини бепул тақдим этсин учун, амалдаги қонунга эътироз билдирадими? – Йўқ, эътирози йўқ. 

Агар шундай қонун қабул қилинса, компания уни ижро этишга тайёрми? – Зўр мамнуният билан!

Бундай қонун лойиҳаси парламентга киритилганми? – Ҳар қалай, компания бу ҳақда эшитмаган.

Расул Хидралиевич Кушербоев шундай ғоя билан ёки эпидемиологик инқирозни енгиш бўйича бошқа ҳар қандай ташаббус билан оммавий баёнот бердими? – Асло йўқ”, дея якунланади баёнот.

Суннатилла Абдуллаев
Мақолага баҳо беринг
Баҳолаганлар: 865
Рейтинг: 3
t
×