“Локомотив” футболчилари кетаётган поезд ҳужумга учради

Россия Премьер-лигасининг 12-турида “Ростов”га қарши ўйиндан кейин (0:2) Москвага қайтаётган “Локомотив” футболчилари ва клуб ходимлари бўлган поезд дрон ҳужумига учради. Бу ҳақда “Локомотив”нинг бир нечта футболчиси агенти Вадим Шпинёв ТАСС агентлигига маълум қилди.

Манбага кўра, клуб вакилларидан ҳеч ким жабрланмаган, бироқ поезддаги беш нафар йўловчи жароҳат олган. “Локомотив” тиббиёт ходимлари воқеа жойида уларга ёрдам кўрсатган. Дрон футболчилар кетаётган вагондан тўртта вагон наридаги вагонга урилган.

“Локомотив” клуби матбуот хизмати жамоа футболчилари ва ходимлари машғулот базасига тўлиқ таркибда қайтгани ва Россия кубоги ҳамда чемпионати учрашувларига тайёргарликни бошлаганини маълум қилди.

Россия темир йўллари аввалроқ Воронеж вилоятидаги Сомово станциясида Анапа – Москва йўналишида ҳаракатланаётган йўловчи поезди вагони дрон ҳужуми оқибатида шикастланганини хабар қилган. Дастлабки маълумотларга кўра, беш нафар йўловчи жароҳат олган ва уларга тиббий ёрдам кўрсатилган.

Воронеж вилояти губернатори Александр Гусевнинг маълум қилишича, бир кеча давомида Воронеж ва унга яқин ҳудудлар осмонида 113 та дрон уриб туширилган. Ҳужум оқибатида уч киши ҳалок бўлган, 39 киши эса жароҳатлангани хабар қилинди.