“Барселона” “Эль-Класико”дан рекорд даражада даромад олди

“Барселона” “Реал”га қарши “Эль-Класико” учрашувидан 19,1 миллион евро даромад олди. Бу клуб тарихидаги мазкур баҳслардан тушган энг юқори тушум ҳисобланади. Бу ҳақда “Mundo Deportivo” нашри хабар берди.

“Камп Ноу” стадионида ўтказилган учрашувдан тушган даромад бундан беш ой аввал ўрнатилган рекорддан ҳам ошди. Бунга чипталар нархининг кўтарилиши ва VIP-ўринлар сонининг кўпайтирилиши ҳисобига эришилди. Жумладан, стадионнинг иккинчи ярусида VIP-томошабинлар учун тўртта янги қатор қўшилди.

Аввалги рекорд жорий йилнинг 10 май куни бўлиб ўтган “Эль-Класико”да қайд этилган бўлиб, ўшанда “Барселона” 16 млн 465 минг 731 евро даромад олган эди. Ўша учрашувда каталонияликлар Ла Лига чемпионлигини таъминлаганди.

Янги кўрсаткич эса 19 млн 105 минг 768 еврони ташкил этди. Шу тариқа, “Барселона” “Эль-Класико”дан тушган даромад бўйича ўз рекордини янгилади.

Маълумот учун, ушбу ғалабадан сўнг “Реал” “Эль-Класико”лар тарихидаги ғалабалар сони бўйича ягона етакчига айланди. Ҳозирда мадридликлар ҳисобида 107 та ғалаба бор. “Барселона” эса 106 марта зафар қучган. Яна 52 та учрашув дуранг билан якунланган.

“Реал” кейинги учрашувини жорий йилнинг 1 ноябрь куни сафарда “Расинг”га қарши ўтказади. “Барселона” эса бир кун олдин ўз майдонида “Алавес”ни қабул қилади.