Андижонда эркак ўғли билан жанжаллашган болани аёвсиз калтаклади (видео)

Ижтимоий тармоқларда бир эркак ўсмирларнинг муштлашувига аралашиб, улардан бирини калтаклагани акс этган видео тарқалган эди. Ушбу эркакка нисбатан жиноят иши қўзғатилди. Бу ҳақда вилоят Ички ишлар бошқармаси хабар берди.

Маълум қилинишича, 18 июнь куни тахминан соат 15:30 ларда Шаҳрихон тумани “Намозгоҳ” МФЙ ҳудудидан оқиб ўтувчи Шаҳрихонсой каналида 2016 йилда туғилган икки нафар бола чўмилиш вақтида жанжаллашиб қолган.

Шундан сўнг, 1988 йилда туғилган ўғил болалардан бирининг отаси жанжалга аралашиб, қўшнисининг боласини калтаклаган.

Ички ишлар бўлимида эркак ўз хатти-ҳаракатларининг оқибатини ўйламасдан, болага руҳий жароҳат етказиши мумкинлигини айтиб, қилган ишидан пушаймонлигини тан олган.

Мазкур ҳолат юзасидан Жиноят кодексининг 277-моддаси (безорилик) 2-қисми “д” банди билан жиноят иши қўзғатилган. Гумонланувчи қўлга олинган. Тергов ҳаракатлари олиб борилмоқда.