FIFA мундиалда Ўзбекистон учун махсус янгиликни жорий қилди

2026 йилги Жаҳон чемпионатида FIFA футболчилар учун уч турдаги махсус эсдалик шевронларини (кийимга (енгига, кўкрагига) тақиладиган ёки тикиладиган махсус белги) жорий қилди. Ушбу янгилик барча иштирокчи жамоалар футболчиларига, жумладан Ўзбекистон терма жамоаси аъзоларига ҳам тааллуқли.

FIFAʼга кўра, Ўзбекистон терма жамоасининг барча 26 нафар футболчиси Колумбияга қарши илк учрашувда “Дебют” шеврони билан майдонга тушади. Бу белги мундиалда биринчи марта иштирок этаётган футболчиларга берилади. Илк ўйинда қатнашган футболчилар кейинги турларда ушбу шевронни тақмайди, захирада қолганлар эса биринчи ўйинига қадар уни сақлаб қолади.

FIFA томонидан жорий этилган шевронлар уч тоифага бўлинган: “Дебют” – Жаҳон чемпионатида илк бор иштирок этаётганлар учун, “Мерос” (Legacy) – бешинчи ёки ундан кўп мундиалда қатнашган футболчилар учун ва “Олтин шон-шараф” (Golden Glory) – аввалги мундиалларда индивидуал мукофотларга сазовор бўлган футболчилар учун. Ламин Ямал ва Эрлинг Ҳоланд ҳам турнирни “Дебют” шеврони билан бошлайди.

“Мерос” ва “Олтин шон-шараф” шевронларига эга футболчилар қаторида Хамес Родригес, Ҳарри Кейн, Килиан Мбаппе, Тибо Куртуа, Эмилиано Мартинес, Лионель Месси, Лука Модрич, Криштиану Роналду, Мануэль Нойер ва Юто Нагатомо бор.

Лионель Месси ва Лука Модрич икки хил шеврон билан майдонга тушади. Месси Жаҳон чемпионатларидаги олтинчи, Модрич эса бешинчи иштироки муносабати билан “Мерос” шевронини тақади. Шу билан бирга, ҳар икки футболчи аввалги мундиалларда “Олтин тўп” соҳиби бўлгани учун “Олтин шон-шараф” шевронини ҳам олади.