Космик дата-марказ: Маск AI1 СИ сунъий йўлдоши тафсилотларини очиқлади

Америкалик тадбиркор Илон Маск глобал орбитал дата-марказ учун космик аппаратнинг илк версиясига айланувчи AI1 сунъий йўлдошининг техник тафсилотларини ошкор қилди. Бу ҳақда компания тақдимотига таяниб, “Bloomberg” хабар берди.

Қайд этилишича, SpaceX компанияси орбитада сунъий интеллект манфаатлари йўлидаги ҳисоблашлар учун мўлжалланган 1 миллион дона ихтисослаштирилган сунъий йўлдошлар тармоғини жойлаштиришни режалаштирмоқда. AI1 аппаратлари Nvidia чиплари ва узунлиги 70 метрга етадиган улкан қуёш панеллари билан жиҳозланади. Фойдали юкнинг ўртача ҳисоблаш қуввати 120 кВтни ташкил этади, пик қуввати эса 150 кВтга етади.

Янги аппаратларни ишлаб чиқариш учун компания Техасдаги ишлаб чиқариш қувватларини кенгайтирмоқда. Қуёш панелларини ишлаб чиқарувчи янги Gigasat заводи 400 гектар ер майдонида 1 миллион квадрат метрдан ортиқ жойни эгаллайди.

Бундан ҳам кенг кўламли бўлган Terafab корхонаси эса 9 миллион 300 минг квадрат метр майдонда қад ростлайди, бу Tesla’нинг Остиндаги гигафабрикаси ўлчамидан тахминан 10 баравар каттадир. Лойиҳа учун ер майдонлари Вайомингдаги аффилланган тузилма томонидан сотиб олинмоқда.

Орбитал дата-марказларнинг яратилиши SpaceX компаниясининг биржага чиқиш (IPO) режаларини тезлаштирмоқда. Бўлажак IPO жаҳон тарихидаги энг йириги бўлиши кутилмоқда. Корпорация сунъий интеллект ишланмалари билан шуғулланувчи Anthropic ва Google компаниялари билан бўлажак космик серверларнинг ҳисоблаш қувватларидан фойдаланиш ҳуқуқини сотиш бўйича дастлабки шартномаларни имзолаган.

Космик инфратузилма ҳамда маълумотларни қайта ишлашнинг юқори технологияли секторлари ривожланиши бутун глобал хизмат кўрсатиш соҳаси ва рақамли иқтисодиёт учун кучли катализатор бўлиб хизмат қилади. Бу IT-бозорини диверсификация қилиш имконини беради, ердаги серверларнинг минтақавий энергетик инқирозларга қарамлигини камайтиради ва ўрта муддатли истиқболда юқори технологияли инвестицияларни глобал миқёсда қайта тақсимлаш учун замин яратади.