Флорентино Перес яна “Реал” президенти этиб сайланди

Мадриднинг “Реал” клуби президенти Флорентино Перес навбатдаги сайловларда ғалаба қозониб, ўз лавозимида қолди.

79 ёшли Перес клуб расмий сайтида эълон қилинган натижаларга кўра, яна президент этиб сайланган. Бу сафар унга тадбиркор Энрике Рикельме рақобатчи бўлди. Бу эса 2009 йилдан бери илк бор “Реал” президенти сайловида муқобил номзод қатнашган ҳолат бўлди.

Перес “Реал”ни 2000 йилдан бери (2006–2009 йиллар оралиғидаги танаффус билан) бошқариб келмоқда. Унинг раҳбарлиги даврида клуб 7 марта Испания чемпиони бўлди, 3 марта мамлакат Кубогини ва 7 марта Суперкубокни қўлга киритди.

Европа аренасида эса мадридликлар 7 марта Чемпионлар лигаси, 6 марта УEФА Суперкубоги, 5 марта клублар ўртасидаги жаҳон чемпионати ва 2 марта Қитъалараро кубок ғолиби бўлган.

Переснинг қайта сайланиши “Реал” икки мавсум кетма-кет совринсиз қолган бир пайтга тўғри келди. Шунга қарамай, клуб раҳбарияти ва аъзолари унинг тажрибаси ҳамда бошқарувига бўлган ишончини яна бир бор тасдиқлаган.

Эслатиб ўтамиз, аввалроқ Мадриднинг “Реал” клуби президенти Флорентино Перес келаси ҳафта “Бавария” футболчиси Майкл Олисе трансфери учун 150 миллион евро таклиф қилиш ниятида экани ҳақида хабар берилганди.