Ўзбекистонга қарийб 600 кг наркотик олиб кираётган шахс ушланди (видео)

Афғонистондан олиб келинган қарийб 600 кг наркотик модда тўхтатиб қолинди. Бу ҳақда Давлат хавфсизлик хизмати хабар берди.

Қайд этилишича, Афғонистон Республикасидан Сурхондарё вилоятидаги “Термиз-авто” чегара божхона постига кириб келган Афғонистон фуқароси бошқарувидаги Mercedes русумли юк автомашинаси ўрнатилган тартибда текширувдан ўтказилган.

Натижада автомашина тиркамасида олиб келинаётган Doosan русумли экскаватор инспекцион кўрик мажмуаси орқали сканер қилинганида, унинг кўтаргич қисми (“стрела”) ичида конструкцияда кўрсатилмаган шубҳали предметлар борлиги кузатилган.

Шундан сўнг, экскаватор туйнуклари эндоскоп махсус техник воситаси орқали кўздан кечирилганда, унинг кўтаргич қисмига 593 кг “гашиш” ва 3 кг “опий” гиёҳвандлик воситалари яширилганлиги аниқланган.

Билдирилишича, ҳозирда ҳолат юзасидан Жиноят Кодексининг 246-(контрабанда) ва 273-моддалари (гиёвандлик воситалари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилиб, ушбу наркотик моддалар эгаларини қўлга олиш чоралари кўрилмоқда.

Эслатиб ўтамиз, аввалроқ Фарғона вилоятининг Қўқон шаҳрида тоға ва жиян наркосавдогарлар қўлга олинган эди.