Зеленский Россия таклифига “сукут режими” билан жавоб қайтарди

Украина Президенти Владимир Зеленский Россиянинг таклифига жавобан 6 майдан бошлаб “сукут режими” жорий этилишини эълон қилди. Бу ҳақда у ўзининг Telegram-каналида ёзиб қолдирди.

Зеленскийнинг сўзларига кўра, Россия учун урушни тугатиш вақти келди, чунки Россия ўз ҳудудида ўтказиладиган парад учун энди Украинанинг қарорларига қараб ҳаракат қилмоқда.

“Биз инсон ҳаётини ҳар қандай “байрам” ёки юбилейдан анча устун қадрият деб биламиз. Шу муносабат билан 5 майдан 6 майга ўтар кечаси соат 00:00 дан бошлаб сукунат режими жорий этилади. Шу вақтдан бошлаб биз ҳам зеркал тарзда ҳаракат қиламиз. Россия раҳбарларига ўз урушини якунлаш учун реал қадамлар қўйиш вақти келди, агар уларнинг Мудофаа вазирлиги Москвадаги парадни Украина қарорларисиз ўтказа олмаслигини тан олса”, дея ёзган Зеленский.

Россия Президенти Владимир Путин апрель ойи охирида Дональд Трамп билан телефон орқали мулоқотда биринчи бор Ғалаба куни муносабати билан ўт очишни тўхтатиш эҳтимолини айтган эди. Украина ҳозирча бу таклифга розилик билдирмаган. Кремль эса Киев розилиги мажбурий эмаслигини, бу Путиннинг қарори эканини ва у амалга оширилишини таъкидлаган.

Зеленский 30 апрель куни бу масалага изоҳ бериб, Украина бир неча соатлик эмас, балки узоқ муддатли ўт очишни тўхтатишдан манфаатдор эканини айтган.

4 май куни у Москвадаги параднинг қисқартирилган форматда – ҳарбий техникасиз ўтказилиши Россия ҳокимиятининг украин дронларидан қўрқаётганини кўрсатишини билдирган.

“Улар ҳарбий техникани намойиш эта олмайди, чунки дронларимиз Қизил майдон устида парвоз қилиши мумкинлигидан қўрқишяпти. Бу улар кучли эмаслигини намоён этади”, деган Зеленкий.

Эслатиб ўтамиз, Россия Федерацияси Мудофаа вазирлиги Украина билан урушда 8 ва 9 май кунлари – Ғалаба куни муносабати билан бир томонлама тарзда ўт очишни тўхтатиш режими жорий этилишини маълум қилганди.