Собиқ депутат жамоат жойида чеккани учун жаримага тортилди

Қирғизистон парламенти – Жогорку Кенешнинг собиқ депутати бўлган Элмирза Сотиболдиев жамоат жойида чеккани учун жаримага тортилди. Бу ҳақда Ўш вилояти Ички ишлар бошқармаси матбуот хизмати хабар берди.

Ижтимоий тармоқларда кеча, 1 май куни Халқаро меҳнат байрами муносабати билан ўтказилган тадбир вақтида Сотиболдиев марказий стадионида сигарет чекаётгани акс этган видео тарқалгач, унга нисбатан жарима қўлланилган.

Милиция вакилларининг таъкидлашича, жарима қонунчиликка мувофиқ қўлланилган бўлиб, қонунларга риоя қилиш барча фуқаролар учун бир хил мажбурий экани қайд этилган.

Маълумот ўрнида, Қирғизистонда Маъмурий жавобгарлик тўғрисидаги кодексининг 83-моддасига кўра, белгиланган жойлардан ташқарида тамаки маҳсулотларини истеъмол қилиш жисмоний шахслар учун 30 ҳисоблаш кўрсаткичига тенг жаримага сабаб бўлади. Бу эса 3 минг қирғиз соми (тахминан 450 минг сўм)га тенг.

Эслатиб ўтамиз, жорий йилнинг март ойида Қирғизистон Ички ишлар вазири Улан Ниязбеков ҳам жамоат жойида чеккани учун маъмурий жавобгарликка тортилган эди.