Эпштейн ўз оролидаги “масжид” учун Ўзбекистондан кошин олган – NYT

north_east

SEX TRAFFICKING ёхуд Ўзбекистонлик қиз ортидан “Гуноҳлар ороли”га йўл

Педофилликда айбланган марҳум молиячи Жеффри Эпштейн ўз оролидаги “масжид” учун Ўзбекистондан кошин сотиб олган. Бу ҳақда “The New York Times” хабар берди.

Нашрнинг ёзишича, можароли молиячи нодир ислом артефактларини сотиб олишга қизиққан. У ушбу буюмларни ўзининг шахсий оролидаги ғайриоддий бинони безаш ва бой ҳамда нуфузли одамлар билан алоқалар тармоғини кенгайтириш учун харид қилган. Эпштейн шахсий суҳбатларда бу бинони “масжид” деб атаган.

Нашр маълумотларига кўра, Маккадаги Каъбадан Қуръон оятлари туширилган кисвалар келтирилган. Шунингдек, Эпштейн ўз иншооти учун Ўзбекистондан масжид кошинларини (плиткаларини) ҳамда қадимги Сурия меъморчилиги намунаси асосида яратилган олтин рангли металл гумбазни сотиб олган.

Яқинда махфийликдан чиқарилган ҳужжатлар Эпштейннинг Литтл-Сент-Жеймс оролидаги сирли бино билан боғлиқ кўп йиллик жумбоққа ойдинлик киритган. Олтин гумбазли, кўк ва оқ чизиқли ушбу бино илгари мусиқа хонаси, павильон, ибодатхона ёки ҳатто оккультизм маскани сифатида таърифланган. Бироқ Эпштейннинг ўзи бу иншоотни тез-тез “масжид” деб атаб келган.

Ҳужжатларга кўра, муқаддас “қадамжо” барпо этиш ғояси унда фоҳишаликка жалб қилиш иши бўйича айбига иқрор бўлиб, қамоқда ўтирган вақтида пайдо бўлган. 2009 йилда озодликка чиқишидан олдин, ёзишмаларга кўра, у атрофида “исломий боғ” бўлган ҳаммом лойиҳаси учун архитекторларни ёллаган. Кейинчалик эса, Эпштейн бу режадан воз кечиб, “мусиқа хонаси” қуриш учун рухсат олишга ҳаракат қилган. Аммо қурилишга алоқадор шахслар билан ёзишмаларда у барибир “масжид” атамасини ишлатган.

NYT суриштирувида айтилишича, 2011 йилда Эпштейн Ўзбекистондаги алоқадор шахсига ҳақиқий кошинлар (плитка) топиш илтимоси билан хат ёзган. 

“Бу худди масжиддаги каби ички деворлар учун бўлади”, деган у.

Молиячи томонидан ёлланган румин рассоми Ион Никола ҳам NYT’га берган интервьюсида Эпштейн бинони мунтазам равишда ўз “масжиди” деб атаганини тасдиқлаган. 2013 йилда у Николага Ҳалабдаги (Алеппо) Ялбуға ҳаммомининг суратини юбориб, шунга ўхшаш эскизлар тайёрлашни сўраган. Шу билан бирга, унинг ушбу бинодан ҳақиқатан ҳам масжид сифатида фойдаланиш нияти бўлган-бўлмагани ҳақида далиллар йўқ.

Маълумот учун, Жеффри Эпштейн 1953 йил 20 январда АҚШда туғилган. У ўз фаолиятини “Bear Stearns” инвестиция банкида бошлаган, кейинчалик “J. Epstein & Co” компаниясига асос солган. 2008 йилда у вояга етмаганларни фоҳишаликка жалб қилишда айбини тан олган. 2019 йилда унга одам савдоси бўйича янги айбловлар қўйилган ва ўша йили Эпштейн қамоқхона камерасида ўлик ҳолда топилган.

2024 йил бошида Нью-Йорк суди бизнесменнинг ҳужжатларини – ичида 150 дан ортиқ кишининг исмлари бўлган “Эпштейн файллари”ни махфийликдан чиқаришни бошлади. Улар орасида таниқли сиёсатчилар ва жамоат арбоблари бор.

Эслатиб ўтамиз, аввалроқ Жеффри Эпштейннинг камерадоши Николас Тартальоне унинг ўлимидан олдин ёзилган деб тахмин қилинаётган мактуб мазмуни ҳақида маълумот берган эди.