Фаластин футбол раҳбари исроиллик ҳамкасбига қўл бермади (видео)

Фаластин футбол федерацияси президенти Жибрил Ражуб конференцияда Исроил футбол ассоциацияси вице-президенти Басим Шейх Сулеймон билан бирга туришдан ва қўл бериб кўришишдан бош тортди. Бу ҳақда “Reuters” нашри хабар берди.  

Канадада бўлиб ўтган FIFA’нинг 76-конгрессида Фаластин ва Исроил вакиллари бир-бирига яқин жойлаштирилган. Иккала шахсни ҳам FIFA президенти Жанни Инфантино минбарга чақирган, аммо Фаластин вакили Сулеймон билан қўл бериб кўришмаган. Инфантино Ражубнинг қўлига тегиб, уни Сулеймонга яқинлашишга ишора қилган, аммо бу уриниш самара бермаган. 

Маълумот учун, Басим Сулеймон Исроилда яшовчи фаластинлик фуқаролардан ҳисобланади.

“Мен исроилликлар томонидан фашизм ва геноцидни оқлаш учун олиб келинган одам билан қўл бериб кўришолмайман! Биз азоб чекяпмиз!”, деган йиғилишда қатнашган Фаластин FA вице-президенти Сусан Шалабий агентликка берган интервьюсида. 

Исроил расмийси эса Ғазода геноцид содир этилётганини рад этган.

“Биз бирга ишлаймиз, президент Ражуб, вице-президент Сулеймон. Болаларга умид бериш учун бирга ишлашимиз керак. Бу жуда мураккаб масалалар”, деган Инфантино шундан сўнг минбарга чиқиб.

Конгресс тугаганидан сўнг нашр билан суҳбатда Шалабий Инфантинонинг Ражуб ва Сулеймонни қўл бериб кўришишга чақириши Фаластин FA раҳбарининг нутқига етарлича эътибор берилмаганини кўрсатганини айтиб ўтган. 

“Жибрил Ражуб қарийб 15 дақиқа давомида қоидалар қанчалик муҳим эканини, бу ҳолат қандай қилиб аъзо ассоциациялар ҳуқуқлари очиқчасига бузилиши учун прецедентга айланиши мумкинлигини тушунтирди, кейин эса бунга шунчаки кўз юмишга уринишди. Бу абсурд! Шунча гаплардан кейин қўл бериб кўришишга мажбур қилинган ҳолат нутқнинг бутун маъносини йўққа чиқаради”, деган у.

Маълумот ўрнида, ўтган ҳафта Фаластин футбол ассоциацияси FIFA’нинг Исроилга қарши чора кўрмаслик қароридан норози бўлиб, Спорт арбитраж судига мурожаат қилган эди. Улар узоқ вақтдан бери Ғарбий соҳилдаги аҳоли пунктларида жойлашган клублар Исроил футбол ассоциацияси лигаларида иштирок этмаслиги кераклигини таъкидлаб келади. Фаластинликлар бу ҳудудни келажакдаги мустақил давлатининг бир қисми сифатида кўришади. FIFA эса ўтган ойда Ғарбий соҳилнинг халқаро ҳуқуқдаги мақоми ҳали ҳал этилмаганини сабаб қилиб, Исроил футбол ассоциацияси ёки клубларига нисбатан ҳеч қандай чора кўрмаслигини маълум қилган. 

Эслатиб ўтамиз, аввалроқ FIFA ва UEFA Исроил жиноятларига шерикликда айбланётгани ҳақида хабар берилган эди.

Ойбек Рустамов