“Биноларни вайрон қилмасин”. Трамп Нетаньяхуни Ливанга аниқ зарба беришга чақирди

АҚШ Президенти Дональд Трамп Исроил Бош вазири Биньямин Нетаньяхуга Ливанга зарбалар бўйича тавсия берди. Бу ҳақда “Axios” хабар берди.

Маълум қилинишича, Трамп Нетаньяхуни Ливанга фақат “аниқ нишонли” зарбалар беришга чақирган. Акс ҳолда, унинг фикрича, Исроил “ўзини ёмон кўрсатиб қўяди”.

“Мен Нетаньяхуга айтдим: у аниқроқ ҳаракат қилиши керак. Биноларни вайрон қилмасин. Буни қилиш мумкин эмас. Бу жуда даҳшатли ва Исроилни ёмон отлиққа чиқаради”, деган Трамп.

У Ливан ва унинг раҳбариятига ижобий муносабатда эканини таъкидлаган. АҚШ Президенти, шунингдек, Теҳронга қарши операция якунлангач, Ливан “яна тикланиши” мумкин деб ҳисоблайди.

“Эрон Ливанни вайрон қилди. Уларнинг қўғирчоғи – “Ҳизбуллоҳ” Ливанни вайрон қилди. Эрон мағлуб бўлса, “Ҳизбуллоҳ” ҳам автоматик тарзда мағлуб бўлади”, деган Трамп.

АҚШ расмийларидан бири нашрга маълум қилишича, Трамп маъмурияти Исроилдан “ўзини тийишни” ва Ливан билан янги дипломатик жараёнга имкон беришни сўраган. Вашингтон Ливан Қуролли кучларига қисқа муддат ичида муаммоларни енгиб ўтишда ёрдам бериш йўлларини изламоқда.

25 апрель куни Биньямин Нетаньяху армияга Ливандаги “Ҳизбуллоҳ” нишонларига кучли зарбалар бериш бўйича кўрсатма берган эди. Бу қарор гуруҳнинг Исроил шимоли ва Ливан жанубида жойлашган қўшинларга ракета ҳамда дронлар билан ҳужум қилганидан сўнг қабул қилинган.

24 апрель куни эса Трамп Исроил ва Ливан ўртасидаги оташкесим Вашингтонда ўтган “жуда яхши” музокаралардан сўнг уч ҳафтага узайтирилишини эълон қилган. Шу куни Исроил Мудофаа армияси “Ҳизбуллоҳ” томонидан учирилган ракеталар тутиб қолинганини маълум қилган.

Мазкур оташкесимдан олдин Вашингтонда сўнгги 34 йил ичидаги илк бор Исроил ва Ливан вакиллари ўртасида музокаралар ўтказилган. Унда АҚШ Давлат котиби Марко Рубио ҳам иштирок этган. Томонлар мулоқотни давом эттиришга келишиб олган.