Ташиев давлат тўнтаришига уриниш ташкил қилган – депутат (видео)

Қирғизистон Жогорку Кенеши депутати Элвира Сурабалдиева Қирғизистон Миллий хавфсизлик давлат қўмитаси (МХДҚ) собиқ раҳбари Қамчибек Ташиев давлат тўнтаришига уриниш ташкил этгани учун лавозимидан озод этилганини маълум қилди. Бу ҳақда у “Уақыт көрсетеді” лойиҳасига берган интервьюсида сўз очди.

Депутатнинг сўзларига кўра, Қамчибек Ташиевнинг ҳамон озодликда экани Президентнинг олийҳимматлиги ифодаси.

“Президент – бағрикенг инсон. Эҳтимол, унинг Ташиевга раҳми келаётгандир, чунки у унинг дўсти. Аниқ билмайман. Лекин ҳозир Президентга жуда қийин, чунки унинг эски дўсти уни лавозимидан четлатишга уринди. Эҳтимол, айнан шу нарса Ташиевнинг ишдан бўшатилишига асосий сабаб бўлгандир”, дейди Элвира Сурабалдиева.

Унинг маълумотига кўра, бу воқеаларга тайёргарлик узоқ вақт давомида олиб борилган, ҳозирда тергов ҳаракатлари кетмоқда, фигурантларнинг бир қисми ҳибсга олинган ёки тергов остида қолмоқда.

“Бир қозонда икки қўчқорнинг калласи қайнамайди, деган мақол бор. Эҳтимол, бу айнан ўша ҳолат”, дейди депутат.

Эслатиб ўтамиз, жорий йилнинг февраль ойида Қамчибек Ташиев Қирғизистон МХДҚ раиси лавозимидан озод этилган эди. Унинг ўзи ишдан бўшатилишини кутмаганини айтган. Шу билан бирга, мамлакат Президенти Қамчибек Ташиев ҳеч қачон давлат хизматига қайтмаслигини маълум қилган. Шундан сўнг Қирғизистонда МХДҚ раҳбарининг собиқ ўринбосари Даниэль Рисалиев ҳибсга олинди. У Қамчибек Ташиев раҳбарлигида ишлаган. Кейинчалик яна бир собиқ ўринбосар – Тимур Шабданбеков қўлга олингани маълум бўлди.