Европа телеканалларида “Eurovision” ўрнига Фаластин ҳақидаги фильмлар намойиш этилади

Ирландия, Испания ва Словения миллий телерадиокомпаниялари бу йил “Eurovision” қўшиқлар танловини эфирга узатмайди. Улар Исроилнинг иштирокини бойкот қилмоқда. Бу ҳақда “The Guardian” нашри хабар берди.

Словения ўз миллий иштирокчисини тақдим этмаслигини маълум қилганидан сўнг, мамлакатнинг RTV телерадиокомпанияси кеча 23 апрель куни дунёдаги энг йирик жонли мусиқий тадбирни эфирга бермаслигини ва унинг ўрнига Фаластин ҳақидаги фильмлар туркумини намойиш этишини тасдиқлаган.

“Биз “Eurovision” қўшиқлар танловини намойиш этмаймиз”, деган RTV директори Ксения Хорват “Associated Press” агентлигига берган интервьюсида. 

Унинг ўрнига “Voices of Palestine” номли фильмлар туркумини – ҳужжатли ва бадиий фильмларни эфирга узатишини маълум қилган.

Испаниянинг RTVE телеканали ҳам ўтган ҳафта “Eurovision”ни намойиш этмаслик қарорини яна бир бор тасдиқлаганди. Мусиқий шоу Испания телевидениесида 1961 йилдан бери илк бор кўрсатилмайдиган бўлган. Ирландиянинг RTÉ давлат телерадиокомпанияси эса, ўтган йилнинг декабридаёқ танловни намойиш этмаслиги ва иштирок ҳам этмаслигини маълум қилган. Нидерландия ва Исландия ҳам ўтган йили декабрда тадбирдан чиқиб кетган, бироқ танлов уларнинг миллий телеканаллари орқали намойиш этилади.

Словения Бош вазири Роберт Голоб, март ойидаги сайловда қайта сайланган бўлиб, Исроилнинг урушини очиқ танқид қилиб келмоқда. 2025 йил августда унинг ҳукумати Ғарбий Соҳилдаги исроиллик аҳоли пунктларидан маҳсулот импортини тақиқлаганини эълон қилган эди.

Маълумот учун, бу йилги “Eurovision” танлови 70 йиллик юбилейининг шоу сони бўлиб, 35 та давлат иштирокида 12–16 май кунлари Австрия пойтахти Вена шаҳрида бўлиб ўтади. Бойкотга асосий сабаб Европа радиоэшиттириш иттифоқининг Исроилга Ғазодаги тажовузкор ҳаракатлари танқид қилинганига қарамай, иштирок этишга рухсат бергани бўлди. 

“Мусиқа орқали бирлашамиз” шиори остида ўтадиган “Eurovision” танлови одатда сиёсатдан узоқ туришга ҳаракат қилади, аммо глобал низолар таъсиридан қоча олмай келмоқда. Россия 2022 йилдан бери Украинага кенг кўламли босқини сабаб танловдан четлатилган. Ғазодаги уруш танлов атрофида норозиликларни кучайтирди, ташкилотчилар эса, майдонлар атрофидаги намойишларга жавобан сиёсий байроқларни кўтаришни чеклашга ҳаракат қилди.

Бу йилги танловда ҳукуматлар ва учинчи томонлар овоз берувчиларга таъсир кўрсатиш учун қўшиқларни тарғиб қилишини чеклашга қаратилган янги қоидалар жорий этилади. Айрим давлатлар Исроил май ойидаги танловда томошабинлар овоз беришида биринчи ўринни олганидан сўнг, тарғибот усуллари бўйича хавотир билдирган эди. Ҳакамлар овозлари ҳисобга олингач эса, у иккинчи ўринни эгаллаган.

Эслатиб ўтамиз, аввалроқ Ғазо секторида ҳар куни Исроил ҳужумлари оқибатида тахминан 50 нафар аёл ва қиз бола ҳалок бўлгани ҳақида хабар берилган эди.

Ойбек Рустамов