ЕИ Қозоғистон компаниясини ҳам “қора рўйхат”га киритди

Европа Иттифоқи кеча, 23 апрель куни Россияга қарши 20-санкциялар пакети доирасида Қозоғистондаги бир компанияга нисбатан чекловлар жорий қилди. Бу ҳақда Европа Иттифоқи Кенгашининг “ЕИ расмий журнали”да эълон қилинган баёнотида айтилади.

Санкцияга учраган компания – Қозоғистонда фаолият юритувчи United Trading Group ҳисобланади. Европа Иттифоқи маълумотига кўра, бу компаниянинг асосчиси ва директори Алимжон Беков Германияда жойлашган UrSeCo Handels GmbH & Co. KG билан алоқадор бўлган.

Брюсселнинг иддаосига кўра, ушбу тармоқ орқали Россияга юқори тозаликка эга хлорводород (HCl) етказиб берилган. Бу модда яримўтказгич пластиналарини қайта ишлашда ишлатилади. Европа томони маълумотида айтилишича, Германия компанияси HCl моддасини United Trading Group’га етказган, кейин эса Қозоғистон компанияси уни Россиядаги Siltron ва Electronsnab корхоналарига юборган.

Ҳужжатларда бу етказиб бериш йўли Польша, Туркия ва Қозоғистон орқали ўтганлиги қайд этилган. Шу асосда Европа Иттифоқи компания санкцияларни четлаб ўтиш қоидаларини бузишда ёрдам берган деган хулосага келган.

Янги пакет доирасида жами 120 та шахсий чеклов, шунингдек энергетика, молия, криптооперациялар, савдо ва Россия ҳарбий-саноат мажмуасига қарши қўшимча иқтисодий чоралар ҳам жорий этилган. Умуман олганда, бу пакет доирасида турли давлатлардан – жумладан Қозоғистон, Хитой, БАА, Ўзбекистон ва Беларусдан 16 та ташкилот ҳам санкция рўйхатига киритилган.

Эслатиб ўтамиз, аввалроқ Европа Иттифоқи Россияга қарши санкцияларнинг 20-пакети доирасида Ўзбекистоннинг пахта целлюлозаси ишлаб чиқариш билан шуғулланувчи икки компаниясига нисбатан чекловлар киритгани ҳақида хабар берилган эди.