Ўзбекистон Гвинея-Бисау билан дипломатик алоқа ўрнатди

Жорий йилнинг 22 апрель куни АҚШнинг Нью-Йорк шаҳрида Ўзбекистоннинг БМТдаги доимий вакили Улуғбек Лапасов ва Гвинея-Бисаунинг БМТдаги миссияси раҳбари Самба Сане дипломатик алоқалар ўрнатиш тўғрисидаги қўшма коммюникени имзолади. Бу ҳақда “Дунё” хабар берди.

Томонлар халқаро ташкилотлар, жумладан, БМТ ва унинг ихтисослашган муассасалари доирасида ҳамкорликни мустаҳкамлашдан манфаатдор эканини билдирган.

Икки томонлама алоқаларнинг ўзаро манфаатли йўналишларини топиш бўйича ҳамкорликни фаоллаштиришга келишиб олинган.

Ғарбий Африка давлати бўлган Гвинея-Бисау Республикаси Ўзбекистон дипломатик алоқалар ўрнатган 168-мамлакатга айланди.

Маълумот учун, Гвинея-Бисау – Ғарбий Африкада жойлашган кичик давлат бўлиб, у Атлантика океани соҳилида жойлашган. Мамлакат шимолдан Сенегал, жануб ва шарқдан Гвинея билан чегарадош. Пойтахти – Бисау шаҳри ҳисобланади.

Мамлакат аҳолиси нисбатан кам бўлиб, турли этник гуруҳлар яшайди, улар орасида баланта, фула ва мандинка халқлари асосий ўринни эгаллайди. Расмий тил – португал тили, аммо кундалик ҳаётда кўпчилик Криолу (креол тили)дан фойдаланади. Дин жиҳатидан аҳолининг катта қисми ислом динига эътиқод қилади, қолганлари эса христианлик ва маҳаллий анъанавий эътиқодларга амал қилади.

Эслатиб ўтамиз, жорий йилнинг 19 апрель куни Анталия шаҳрида Ўзбекистон ва Руанда Ташқи ишлар вазирлари Бахтиёр Саидов ва Оливье Ндуҳунгиреҳе дипломатик алоқалар ўрнатиш тўғрисидаги қўшма коммюникени имзолаган эди.