Трамп Эрон билан сулҳни қачонгача узайтиргани маълум бўлди

АҚШ Президенти Дональд Трамп Эрон билан тузилган вақтинчалик сулҳ муддатини 26 апрель, якшанбагача узайтирди. Бу ҳақда ўз манбаларига таяниб, “Ynet” нашри хабар берди.

Маълумотларга кўра, Оқ уй бу қарор ҳақида Исроил томонини ҳам олдиндан хабардор қилган.

Трамп сулҳ муддатини узайтириш ҳақида 21 апрель куни эълон қилган. Бу қарор Теҳрон ўша куни Покистонда режалаштирилган музокараларни эътиборсиз қолдиргани ва АҚШ талабларига жавоб бермаганидан сўнг қабул қилинган.

Оқ уй расмий равишда аниқ “якуний муддат”ни эълон қилмаган. Президент матбуот котиби Кэролайн Ливиттнинг айтишича, Трамп қатъий муддат белгиламаган ва ўт очишни тўхтатиш режимини сақлаб туриб, “бутунлай мағлуб этилган режимга маълум даражада мослашувчанлик кўрсатмоқда”.

Ҳозирда Вашингтон Эрон томонидан АҚШ таклифларига қандайдир жавоб кутмоқда. Ливиттнинг таъкидлашича, Теҳронда ички келишмовчиликлар мавжуд.

“Аёнки, у ерда жиддий ички бўлиниш бор. Ҳозир Эронда прагматиклар ва кескин сиёсат тарафдорлари ўртасида кураш кетмоқда. Президент эса ягона ва аниқ жавобни кутмоқда”, деган Оқ уй вакиласи.

Эслатиб ўтамиз, аввалроқ АҚШ Давлат департаменти мамлакатда авиақатновлар қисман тикланганига қарамай, америкаликларни Эронни зудлик билан тарк этишга чақирганди.

Қолаверса, АҚШ Президенти Дональд Трамп Эрон билан ўт очишни тўхтатиш режимини узайтириш ҳақида буйруқ берган. Кейинчалик, Эрон Теҳрон расмийлари АҚШ Президенти Дональд Трампдан ўт очишни тўхтатиш режимини узайтиришни сўрамагани ва бу узайтиришни қабул қилмаслигини айтди.