Путин ва Зеленский учрашуви қачон ўтказилиши айтилди

Россия Президенти Владимир Путин ва Украина Президенти Владимир Зеленский ўртасидаги учрашув фақат олдиндан келишувлар тайёр бўлгандагина ўтказилиши мумкин. Бу ҳақда Россия Президенти матбуот котиби Дмитрий Песков маълум қилди.

Унинг сўзларига кўра, бундай учрашувнинг асосий мақсади эришилган келишувларни якунлашдан иборат бўлади.

“Энг муҳими – учрашувнинг мақсади. Нима учун учрашиш керак? Путин исталган вақтда Москвада учрашишга тайёрлигини айтган. Асосийси, учрашувдан мақсад бўлиши ва у натижа бериши керак. Бундай учрашув фақат келишувларни якунлаш учун ўтказилиши мумкин”, деган Кремль вакили.

Апрель ўрталарида Украина Ташқи ишлар вазири Андрей Сибига Киев Зеленский ва Путин учрашувини Туркияда ўтказишга тайёрлигини билдирган. Украина томони саммитда Туркия Президенти Ражаб Тойиб Эрдўған ва АҚШ Президенти Дональд Трамп ҳам иштирок этишини истамоқда.

Январь–февраль ойларида БААда ўтган Россия, Украина ва АҚШ ўртасидаги музокаралардан сўнг “Axios” нашри америкалик амалдорларга таяниб, томонлар етакчилар учрашувига яқинлашганини ёзган эди. Бироқ февраль охирида АҚШнинг Теҳронга қарши операцияси бошлангач, музокаралар жараёни секинлашди.

Шу сабаб Зеленский АҚШ ва Эрон ўртасидаги можаро Украинанинг келажаги бўйича хавотирлар уйғотаётганини айтган. Кремль эса АҚШнинг бандлиги ошганини тан олган, аммо Вашингтон музокаралардан чиқиб кетишига оид аломатлар йўқлигини билдирган.

Зеленский эса, Путин билан учрашишга тайёрлигини билдирган, аммо учрашувни Москва ёки Киевда ўтказишни рад этиб, Яқин Шарқ, Европа ёки АҚШ давлатларидан бирини таклиф қилган. Шунингдек, у учрашувни Қозоғистонда ўтказишни ҳам илгари сурган.

Эслатиб ўтамиз, аввалроқ Владимир Зеленский Германиянинг ZDF телеканалига берган интервьюсида АҚШ ҳозир Эрон билан боғлиқ уруш ва музокаралар билан бандлиги сабаб Украинага етарлича вақт ажрата олмаётгани ҳақида гапирганди.