Эронга алоқадор 30 дан ортиқ кема АҚШ блокадасини ёриб ўтди

Камида 34 та Эронга алоқадор танкер Араб денгизи чегарасида кемалар ҳаракатини тўсиб турган АҚШ ҳарбий кемалари ёнидан сузиб ўтишга муваффақ бўлди. Бу ҳақда денгиз трафигини кузатувчи Vortexa маълумотларига таяниб, “Financial Times” нашри хабар берди. 

Қайд этилишича, улар орасида Эроннинг қиймати қарийб 1 миллиард долларлик нефтини олиб чиқиб кетган бир нечта танкерлар ҳам бор. Блокадани икки томонлама ёриб ўтган танкерлар сони, АҚШ Ҳарбий-денгиз кучлари томонидан куч ишлатиш таҳдиди остида ортга қайтарилган кемалар сонидан кўпроқни ташкил этмоқда. Марказий қўмондонлик кеча, 21 апрель куни берган хабарига кўра, блокада бошланганидан бери Эрон портларини тарк этмоқчи бўлган 28 та кемадан ортга қайтиш талаб қилинган.

Дональд Трамп CNBC телеканалига берган интервьюсида АҚШ блокадасини “улкан муваффақият” деб атаган. У Вашингтон Теҳрон билан “якуний келишув”га эришмагунча блокада бекор қилинмаслигига ваъда берган.

АҚШ Ҳарбий-денгиз кучлари томонидан ташкил этилган блокада

Эрон портларидан кемалар чиқиши ва уларга киришига тақиқ жорий йилнинг 13 апрель куни жорий этилган эди. 16 апрель куни эса АҚШ очиқ денгизда ҳам Эроннинг “соядаги флоти” танкерларини, шунингдек, ҳозирги ҳарбий низода Эрон фойдаланиши мумкин бўлган юкларни ташувчи кемаларни таъқиб қилишини эълон қилди. Шундан сўнг Уммон қўлтиғида битта контейнер ташувчи кема тўхтатилди, Ҳинд-Тинч океани минтақасида эса америкаликлар санкция остидаги танкерни бортга чиқиш йўли билан эгаллаб олди.

“Vortexa” маълумотларига кўра, камида 19 та Эронга алоқадор танкер Форс кўлтиғини тарк этиб, Ҳормуз бўғози ва Уммон кўрфазидан ўтган, яна камида 15 таси Араб денгизидан Эрон томон йўл олиб, Форс кўрфазига кирган. Кўрфазини тарк этган кемаларнинг камида олтитаси 10,7 млн баррель Эрон нефтини олиб кетаётгани тасдиқланган.

Эрон нефти Brent эталон навидан арзонроқ сотилади. Агар чегирма 10 доллар деб ҳисобланса, ушбу ҳажм эронликларга тахминан 910 млн доллар даромад келтириши керак.

Ўз навбатида, Эрон бугун, 22 апрель куни Ислом инқилоби қўриқчилари корпуси (ИИҚК) ҳарбий-денгиз кучлари иккита савдо кемасини – MSC Francesca ва Epaminondasни қўлга олиб, ўз ҳудудий сувларига кузатиб қўйганини маълум қилди. Эрон ҳам кемалар ҳаракатини тўсиб қўймоқда, бироқ бу ишни ўзи назорат қиладиган Ҳормуз бўғози орқали амалга оширмоқда. Бугун, 22 апрель куни эрталаб Буюк Британия денгиз идоралари бўғозда иккита кема ҳужумга учраганини хабар қилди, бироқ баёнотда уларнинг қўлга олингани ҳақида айтилмаган. 

Греция Денгиз ишлари вазирлиги эса Греция компаниясига тегишли бўлган Epaminondas кемаси ИИҚК томонидан қўлга олингани ҳақидаги маълумотни рад этди.