Трамп НАТО давлатларининг “қора рўйхати”ни тузди 

АҚШ Президенти Дональд Трамп Эронга қарши урушни қўллаб-қувватлашдан бош тортган НАТО давлатлари рўйхатини тузди ва уларга таъсир ўтказиш чораларини кўрмоқда. Бу ҳақда ушбу режадан хабардор бўлган уч нафар европалик дипломат ва АҚШ Мудофаа вазирлиги вакилларига таяниб, “Politico” хабар берди.

Нашрга ёзишича, Оқ уй Эрон урушини қўллаб-қувватламаган альянс аъзолари рўйхатини НАТО раҳбари Марк Рюттенинг шу ойда Вашингтонга кутилаётган ташрифи арафасида тайёрлаган. Хабар қилинишича, Оқ уй альянсга аъзо мамлакатларнинг ташкилот фаолиятига қўшаётган ҳиссаси бўйича таҳлилий ҳисобот тақдим этмоқчи.

“Бу Президент Дональд Трампнинг унинг кўрсатмаларига амал қилмаган иттифоқчиларга нисбатан ўз таҳдидларини амалга ошириш ниятида эканининг навбатдаги белгисидир.

Бу шундоқ ҳам заифлашган ва Трампнинг Гренландияни қўшиб олиш интилишидан тортиб, келишувдан тўлиқ чиқиш ҳақидаги огоҳлантиришларигача бўлган ҳужумларига дуч келган альянс учун қўшимча босим омили бўлади”, дейилади хабарда.

Эслатиб ўтамиз, аввалроқ Дональд Трамп НАТО бўйича иттифоқчилари ва ҳамкор давлатларни Ҳормуз бўғозида кемалар қатнови хавфсизлигини таъминлашга ёрдам беришга чақиргани ҳақида хабар берилган эди. Трамп бўғозни ҳимоя қилиш бўйича халқаро коалиция тузиш устида ишламоқда ва Эроннинг ўта муҳим ҳисобланган Харг оролини эгаллаб олиш имкониятини кўриб чиқмоқда. Бироқ Буюк Британия, Франция, Германия ва Жанубий Корея ўз ҳарбий кемаларини Ҳормуз бўғози ҳудудига юборишга тайёр эмас. Шу сабабли коалиция йиғиш ва бўғозни блокдан чиқариш режасини тайёрлашга шошилинч равишда киришишга тўғри келмоқда.

Шу билан бирга, Европа Иттифоқи Трампнинг чақириқларига рад жавобини бергани маълум бўлди. ЕИ фикрича, Ҳормуз бўғозининг ёпилиши “жаҳон иқтисодиётига зарар етказади ва Россияга урушни молиялаштиришга ёрдам беради”. Кейинчалик Трамп НАТОнинг жанговар ҳаракатларда қатнашишдан бош тортганига ғазаб билан муносабат билдирди.