Saneg’га берилган конларда қазиб олиш ҳажми камайган – “Ўзбекнефтгаз”

2019 йилда “Ўзбекнефтгаз”дан “Саноат энергетика гуруҳи” (Saneg) компаниясига берилган 100 дан ортиқ нефть-газ конларида қазиб олиш ҳажми камайган. Бу ҳақда кеча, 20 апрель куни бўлиб ўтган матбуот анжуманида “Ўзбекнефтгаз” бош геологи Нодир Муҳиддинов маълум қилди.

Унинг айтишича, 2019 йилда ҳукуматнинг махсус қарори билан “Ўзбекнефтгаз”дан Saneg бошқарувига ўтказилган конларда маълум муддатда газ, нефть қазиб чиқариш ҳажми ўсган, аммо охирги йилларда бу кўрсаткичлар пасайган.

Бу ҳолат бўйича Махсус комиссия ташкил қилинган. Айнан шу комиссия томонидан текширув ўтказилади ҳамда хулоса ва натижалар асосида тегишли қарор қабул қилинади.

Маълумот учун, 2019 йилда ҳукуматнинг ёпиқ қарори билан 100 дан ортиқ конлар “Ўзбекнефтгаз” АЖдан Saneg бошқарувига ўтказилган. Ушбу конларнинг берилиши 2020-2030 йилларга мўлжалланган нефть қазиб олишни ошириш лойиҳаси билан боғлиқ. Бугунги кунда Saneg’га 103 та нефть ва газ конлари қаъридан ҳамда ер қаъри участкаларидан фойдаланиш ҳуқуқи берилган.