КХДР модификацияланган баллистик ракеталарни учирди

КХДР Ракетасозлик бош бошқармаси “ер-ер” синфига кирувчи модификацияланган “Хвасонпхо-11ра” тактик баллистик ракеталарини синовдан ўтказди. Бу ҳақда Корея марказий телеграф агентлиги (КМТА) хабар берди.  

Қайд этилишича, синов жараёнларини КХДР етакчиси Ким Чен Ин ҳамда партия ва ҳарбий раҳбарият вакиллари бевосита кузатиб борган. Жами бешта ракета 136 км масофадаги нишонга қарата учирилган. Зарба 12,5-13 гектар майдонга юқори зичликдаги шикаст етказиш билан амалга оширилган. Синовлардан кўзланган мақсад парчаланувчи-фугасли жанговар қисмларнинг техник хусусиятларини текширишдан иборат бўлган.

Ким Чен Ин синов натижаларидан мамнунлигини билдирган ва ракетанинг жанговар қисмини беш йил давомида ишлаб чиққан мутахассислар меҳнатини юқори баҳолаган.

Шунингдек, КМТАнинг аввалроқ (9 апрель) берган хабарига кўра, КХДРда сочилувчи (кассетали) жанговар қисмга эга тактик баллистик ракета ва электромагнит қурол тизими ҳам синовдан ўтказилган. Ушбу синовлар натижасида “Хвасонпхо-11-га” ракетасининг кассетали қисми 6,5–7 гектар майдондаги нишонларни юқори зичликда йўқ қилиш имкониятига эга экани тасдиқланган.

Эслатиб ўтамиз, жорий йил январь ойида Шимолий Корея Ким Чен Ин кузатуви остида гипертовушли ракеталарни ҳам синовдан ўтказган эди. Ўшанда ракеталар Шарқий денгиздаги белгиланган нишонларга аниқ зарба берган.