Италияда босқинчилар банкни тўнаб, туннелда изсиз ғойиб бўлди

Кеча, 16 апрель куни Италиянинг Неаполь шаҳрида қуролланган гуруҳ банк филиалини талон-торож қилиб, 25 кишини гаровга олди ва ерости туннеллари орқали қочиб кетди. Бу ҳақда BBC хабар берди.

Маҳаллий вақт билан туш пайти бошланган ҳодисада полиция қисқа фурсатда банкни қуршаб олган. Тахминан икки соат давом этган музокаралардан сўнг гаровдагилар озод қилинган, аммо жиноятчилар изсиз ғойиб бўлган.

Фавқулодда хизмат ходимлари банк ойналарини синдириб, ичкаридаги одамларни эвакуация қилган. Шок ҳолатига тушган олти кишига тиббий ёрдам кўрсатилган. Гувоҳлардан бири жиноятчилар уларни хонага қамаб қўйганини, қуролланган бўлса-да, зарар етказмаганини айтган.

Воқеа катталашгани сабаб бошқа ҳудуддан полиция махсус кучлари жалб қилинган. Минглаб одамлар жонли эфир орқали кузатган операция давомида банк ичига бостириб кирилган. Бироқ ичкарига кирилганда талончилар аллақачон қочиб кетгани маълум бўлган.

Аниқланишича, улар олдиндан тайёрланган туннель орқали канализация тизимига тушиб, изсиз йўқолган. Ҳозирча талончиликнинг молиявий зарари аниқ эмас. Маълумотларга кўра, жиноятчилар нақд пулдан кўра кузатиш қийин бўлган шахсий сейфлардаги қимматбаҳо буюмларни нишонга олган. Полиция канализация тармоғи бўйлаб кенг кўламли қидирув ишларини бошлаган.

Эслатиб ўтамиз, аввалроқ Италиядаги музейдан Ренуар, Сезанн ва Матисснинг миллионлаб долларлик асарлар ўғирлаб кетилганди. Юзларини беркитиб олган ўғрилар кириш эшигини бузган ва бор-йўғи уч дақиқа ичида санъат дурдоналари билан боғ орқали ғойиб бўлган.