Россия армиясига ёлланган ўзбекистонликка ҳукм ўқилди

Россия армиясига ёлланиб, Украина билан урушда қатнашган ўзбекистонлик эркакнинг озодлиги 3 йил 6 ойга чекланди. QALAMPIR.UZ суд ҳужжати билан танишди.

Ҳужжатда келтирилишича, Сурхондарё вилоятининг Шўрчи туманида туғилган эркак Ю.А. 2024 йилнинг 25 ноябрь куни ишлаш мақсадида Россияга борган. У маълум муддат киракашлик қилган ва 2025 йилнинг август ойида оддий аскар сифатида Россия армиясига ёлланган. Шундан сўнг у ҳарбий қисмда тайёргарликдан ўтиб, Курск вилояти ҳудудида Россия – Украина ўртасидаги жанговар ҳаракатларда иштирок этган. Эркак 2025 йилнинг 9 сентябрь куни Украина томонидан отилган снаряд портлаши оқибатида чап елкаси ва чап оёғидан тан жароҳат олган. У даволаниш учун Москва вилояти Красногорск шаҳридаги Вишневский номли ҳарбий госпиталга жойлаштирилган ва у ерда олган тан жароҳатлари бўйича бир неча марта жарроҳлик амалиётини ўтказган. Шундан сўнг эркак Украинага қарши ҳарбий ҳаракатларда иштирокини давом эттириш ниятидан қайтган. 2025 йил 21 октябрь куни Москва шаҳридаги Ўзбекистон Республикаси элчихонасидан ортга қайтиш гувоҳномасини олиб, 22 октябрь куни “Москва-Тошкент” йўналиши орқали Тошкент шаҳридаги Ислом Каримов номидаги халқаро аэропортга учиб келган. 

Жорий йилнинг 24 март куни Жиноят ишлари бўйича Шўрчи туман судида мазкур иш кўриб чиқилган. Судда Ю.А. айбига қисман иқрор бўлиб, кўрсатма берган. Унинг айтишича, 2025 йилнинг 12 февраль куни киракашлик қилиб, 2 йўловчини олиб кетаётганида ички ишлар органлари ходимлари томонидан тўхтатилган. Шунда йўловчилардан гиёҳвандлик моддалари топилган ва уни ҳам йўловчиларнинг шериги сифатида қўлга олишган. Ю.А. нинг билдиришича, у тергов жараёнида ИИО ходимлари томонидан қийноққа солинган ва Россия армиясига ёлланишга мажбурланган. Шундан сўнг у Донецк шаҳридаги ҳарбий полигонга олиб борилиб, урушга тайёргарликдан ўтказилган. 2025 йилнинг 9 сентябрь куни Курск вилоятига кетаётганда уларнинг машинасига снаряд урилган. Оқибатда у билан бирга автомобилда бўлган 3 киши ҳалок бўлган. Ушбу воқеадан сўнг Ю.А. Москва вилоятидаги ҳарбий госпиталга юборилган. Эркакнинг айтишича, у аҳволи бироз яхшилангандан сўнг госпиталдан қочган ва Ўзбекистоннинг Москвадаги элчихонасига бориб, ортга қайтиш учун ҳужжат олган. Шундан сўнг Ўзбекистонга қайтиб келган.

Ю.А. Жиноят кодексининг 154-моддаси (Ёлланиш) 1-қисми ва 154-1-моддаси (Чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёлланиш) 2-қисмида назарда тутилган жиноятларни содир қилганликда айбли деб топилган. Унга тайинланган жазоларни қисман қўшиш йўли билан билан узил-кесил шифохонага бориш ва уй-жойига қайтиб келиши учун зарур бўлган вақтдан ташқари қолган вақтда яшаш жойидан чиқишини чеклашдан иборат 3 йил 6 ой муддатга озодликни чеклаш жазоси тайинланган.

Эслатиб ўтамиз, аввалроқ ҳам Россия томонидан урушда қатнашган ўзбекистонлик эркакка 3 йил муддатга ахлоқ тузатиш ишлари жазоси тайинланган эди.