Россия ва АҚШ ўртасидаги асосий муаммо айтилди

Россия ва АҚШ муносабатларидаги энг катта муаммо – АҚШ маъмуриятининг аниқ бир тўхтамга кела олмаслигида. Бу ҳақда кеча, 22 апрель куни Россия ТИВ раҳбарининг ўринбосари Александр Панкин БМТ бош қароргоҳида журналистларга маълум қилди.

Унинг таъкидлашича, Москва ва Вашингтон ўртасидаги муносабатлар ҳозир энг паст даражага тушиб кетган.

“Муаммо шундаки, барқарорлик ва аниқлик йўқ. Эрталаб бир гапни эшитасиз, кечқурун бошқасини, кейинги куни эса иккаласига ҳам зид ҳаракатларни кўрасиз. Юқори даражадаги олдиндан айтиб бўлмаслик – энг катта муаммо”, деган у.

Шу билан бирга, Панкин Россия Президенти Владимир Путин ва АҚШ Президенти Дональд Трамп ўртасида Аляскада бўлиб ўтган бевосита учрашувларни “анча самарали” деб баҳолаган.

У, шунингдек, АҚШ томонидан Россия нефтига нисбатан санкцияларни юмшатиш муддатини узайтириш эҳтимоли ҳақида ҳам фикр билдирган. Панкиннинг айтишича, Россия санкциялар масаласида доим энг ёмон сценарийга тайёр туради.

“Биз одатда яхши янгилик кутмаймиз. Агар ижобий нарса юз берса – бу яхши”, деган ТИВ вакили.

Қайд этиш жоиз, жорий йилнинг март ойида АҚШ Россия нефти ва нефть маҳсулотларига қўйилган айрим санкцияларни вақтинча юмшатиб, 12 мартгача танкерга юкланган маҳсулотларни сотишга рухсат берган эди. Ушбу рухсатнома 11 апрелгача амал қилган, кейинчалик эса янги лицензия берилиб, унинг муддати 16 майгача узайтирилган.