Россия томонидан урушда қатнашган ўзбекистонлик жазоланди

Россия томонидан урушда қатнашган ўзбекистонлик эркакка 3 йил муддатга ахлоқ тузатиш ишлари жазоси тайинланди. QALAMPIR.UZ суд ҳужжати билан танишди.

Унга кўра, мазкур иш жорий йилнинг 6 январь куни Жиноят ишлари бўйича Бандихон туман судида кўриб чиқилган. 

Қайд этилишича, 1993 йилда туғилган, Сурхондарё вилояти Шеробод туманида яшовчи эркак 2025 йил 16 январ куни Россия Федерациясига пул ишлаб топиш мақсадида борган. У ерда россиялик таниши орқали 2025 йил 7 апрел куни Россия-Украина урушида иштирок этиш учун ҳарбий қисми билан шартнома тузган. Шартнома тузгандан сўнг, 2025 йил 5-10 май кунлари унинг номига очилган банк картасига 1 млн 600 минг рубль миқдоридаги пул ташлаб берилган. 

Судланувчи 15 кун давомида дастлабки ҳарбий тайёргарликдан ўтган. У бошқа аскарлар билан биргаликда Луганск Халқ Республикасининг Марков шаҳридан 15 км узоқликдаги дала майдонига бориб, жойлашган ва икки ой давомида ҳарбий тайёргарлик жараёнларида қатнашган.

Орадан бироз вақт ўтгач, эркак урушда қатнашиш ҳаёти учун хавфли экани ва қилган иши нотўғрилигини тушуниб етиб, жанговар ҳудуддан қочиб кетган.  Шундан сўнг, 2025 йил 21 сентябрь куни Москва шаҳрида жойлашган Ўзбекистон элчихонасига мурожаат қилган. Элчихона кўмаги билан 26 сентябрь куни Тошкентга қайтиб келган ва ҳуқуқни муҳофаза қилувчи органларга топширилган.

Суд ҳукмига кўра, эркак  Жиноят кодексининг 154-1-моддаси (чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёлланиш) 1-қисми билан айбли деб топилган. Унга нисбатан иш ҳақининг 20 фоизини давлат даромади ҳисобига ушлаб қолган ҳолда 3 йил муддатга ахлоқ тузатиш ишлари жазоси тайинланган. Шундан қамоқда сақланган 103 куни ахлоқ тузатиш ишлари жазосининг уч кунига тенглаштирилиб, узил-кесил ўташ учун 2 йил 1 ой 26 кун ахлоқ тузатиш ишлари жазоси қолдирилган.

Маълумот ўрнида, бу Россиядаги ўзбекистонлик фуқароларнинг Украинага қарши урушга биринча марта ёлланиши эмас. Масалан, 2025 йил августь ойида, Украина Мудофаа вазирлиги ва Бош разведка бошқармаси кўмагида ташкил этилган “Хочу жить” (“Яшашни хоҳлайман”) лойиҳаси Украинага қарши урушда қатнашиш учун Россия Қуролли кучлари билан шартнома имзолаган 902 нафар Ўзбекистон фуқаросининг исм-шарифини эълон қилганди.

Эслатиб ўтамиз, олдироқ Ўзбекистонлик эркак Россияда босим остида урушга юборилганлиги ҳақида хабар берилганди.