“Биз қайтамиз”. Мағлуб бўлган Орбан халқига мурожаат қилди

Венгрия Бош вазири Виктор Орбан парламент сайловларида мағлубиятга учраганидан сўнг, кеча, 13 апрель куни кечқурун видеомурожаат билан чиқди.

У 12 апрель куни ўтган сайловларда унинг “Фидес” партияси ва Христиан-демократик халқ партияси номзодларини 2,25 миллиондан ортиқ сайловчи қўллаб-қувватлаганини таъкидлаган. Орбан 2014 йилда айнан шунча овоз билан катта ғалабага эришилганини эслатиб, бу сафар бу натижа фақат мағлубият учун етганини айтган.

Унинг сўзларига кўра, “Фидес” ҳали ҳам мамлакатдаги энг бирлашган сиёсий куч бўлиб қолмоқда ва партия бундан кейин ҳам венгер халқига хизмат қилишда давом этади.

Мурожаат якунида у яқин ҳафталарда партия қайта ташкил этилишини, барча сайлов округларига ташриф буюрилишини, фаоллар ва тарафдорлар сафарбар этилишини ҳамда 28 апрель куни умумий миллий кенгаш йиғилиши ўтказилишини маълум қилиб, “Олдинга, Венгрия! Олдинга, венгерлар!” дея чақириқ қилган.

Бу Орбан мағлубиятдан кейин Facebook’да эълон қилган илк видеомурожаати бўлди. Аввалроқ, у қисқа нутқ билан партиясининг ютқазганини тан олган эди. Сўнгги маълумотларга кўра, унинг партияси 199 ўринли парламентда 56 мандатни қўлга киритган, ғалаба эса Петер Мадьяр етакчилигидаги “Тиса” партиясига насиб этиб, улар 136 ўрин билан кўпчиликнинг овозини қўлга киритган.

Маълумот учун, Мадьяр коррупцияга қарши курашиш, тизимли ислоҳотлар ўтказиш ва янги конституция ишлаб чиқишни ваъда қилган. Шунингдек, у Венгрияни Россиядан узоқлаштириш ва НАТОдаги ишончли ҳамкор сифатидаги ролини тиклаш тарафдори эканини билдирган.

Орбан эса Россия Президенти Владимир Путиннинг Европадаги асосий ҳамкорларидан бири саналади. АҚШ Президенти Дональд Трамп ҳам Орбанни қўллаб-қувватлаган. У агар Орбан бош вазирликда қолса, АҚШ Венгриянинг гуллаб-яшнашига ҳисса қўшишга тайёрлигини айтган.

Эслатиб ўтамиз, аввалроқ сайловларда ғолиб бўлган Мадьяр унинг партияси Украинанинг Европа Иттифоқидан кредит олишига тўсқинлик қилмаслиги ҳақида айтганди.