Испания Бош вазири ЕИни Исроил билан келишувни тўхтатишга чақирди

Испания Бош вазири Педро Санчес халқаро ҳуқуқ меъёрлари бузилаётгани сабабли Европа Иттифоқи Исроил билан ассоциация шартномасини тўхтатиб туриши кераклигини айтди. Бу ҳақда у бугун, 10 апрель куни матбуот анжуманида сўз очди.

“Шу сабабли, кеча Испания ҳукумати ва шахсан мен изчиллик ҳамда бирдамлик нуқтаи назаридан Европа Иттифоқи Исроил билан ассоциация шартномасини тўхтатиб туриши кераклигини таклиф қилдик. Чунки Исроил ушбу келишувнинг кўплаб қоидаларини, биринчи навбатда халқаро ҳуқуқ ва халқаро гуманитар ҳуқуққа риоя қилиш билан боғлиқ бандларини бузаётгани кундек равшан”, дейди у.

Санчеснинг сўзларига кўра, Европа изчил ҳаракат қилиши ва “икки ёқлама стандартлар”дан воз кечиши керак, чунки “глобал Жануб”нинг кўплаб мамлакатлари унинг хатти-ҳаракатларини кузатиб турибди. У халқаро ҳуқуққа риоя қилиш Европа Иттифоқининг дунё майдонидаги ишончини сақлаб қолиш учун асосий шарт эканини таъкидлаган.

Шунингдек, Санчес Европа Иттифоқи фақат хавотир билдириш билан чекланиб қолмай, халқаро гуманитар ҳуқуқ бузилишига жавобан аниқ қадамлар ташлаши лозимлигини қайд этган.

Маълумот учун, бундан аввал ҳам Испания расмийлари Исроилнинг ички ва ташқи сиёсатига оид қарорларини бир неча бор танқид қилган. Шу билан бирга, Мадрид ҳукуматнинг ҳеч бир қарори Исроил давлати ёки унинг халқига қарши эмаслигини, балки урушга ва халқаро ҳуқуқ бузилишига қарши қаратилганини таъкидлаб келмоқда.

Эслатиб ўтамиз, аввалроқ Эрон ўз ракеталаридан бирига урушни қўллаб-қувватламаган Испания Бош вазири Педро Санчеснинг суратини ва миннатдорлик сўзларини жойлаштирганди.