Трампнинг яқинлари урушдан шахсий бойлик орттирган – ОАВ

АҚШ Президенти Дональд Трампнинг яқинлари Эрондаги можаро туфайли бойиб кетган бўлиши мумкин. Бу ҳақда Австриянинг “Der Standard” газетаси хабар берди.

Жорий йилнинг 23 март куни эрталаб тўсатдан ярим миллиард долларлик битимлар тузилгани нашр эътиборин тортган. Қайд этилишича, ушбу битимларни амалга оширган томон нефть нархи тез орада тушишига аниқ ишонган. “Der Standard”нинг эътиборини тортган жиҳати шундаки, орадан 15 дақиқа ўтиб Трамп ўзининг Truth Social ижтимоий тармоғида “самарали музокаралар” ҳақида пост қолдирган. Шундан сўнг нефть нархи пасайган ва ўша “биржа спекулянти” катта фойда кўрган.

Шунингдек, жорий йилнинг 28 февраль куни Эрон Олий раҳнамоси Оятуллоҳ Али Хоманаийнинг йўқ қилинишидан ҳам кимдир яхшигина даромад қилган. “Der Standard” маълумотларига кўра, воқеалар натижасига пул тикиш имконини берувчи “Polymarket” платформасидаги олтита аккаунт жами 1,2 миллион доллар фойда олган. “Bubblemaps” таҳлилий фирмасининг билдиришича, ушбу аккаунтларга пул маблағлари Эронга берилган авиазарбалардан атиги бир неча соат олдин ўтказилган.

Эслатиб ўтамиз, жорий йилнинг 7 апрель куни АҚШ ва Эрон икки ҳафталик ўт очишни тўхтатишга келишиб олди. Нефть нархи бу хабарга кескин пасайиш билан жавоб берди – котировкалар бир лаҳзада 16 фоиздан кўпроққа арзонлашди.