Ўзбекистоннинг олтин-валюта захиралари 8,1 млрд долларга камайди

Жорий йилнинг март ойида Ўзбекистоннинг олтин-валюта захиралари қиймати 8,1 млрд долларга камайди. Бу ҳақда Марказий банк ҳисоботида келтирилган.

Марказий банк маълумотларига кўра, жорий йил 1 апрель ҳолатида Ўзбекистоннинг халқаро захиралари 68,99 млрд долларни ташкил этган. Март ойи давомида у 8,1 млрд долларга камайган.

Захираларнинг валюта қисми 1,26 млрд долларга, олтин қисми қиймати эса 6,82 млрд долларга пасайган. Шу билан бирга, олтиннинг жисмоний ҳажми 13,1 миллиондан 13,4 млн троя унциясигача кўпайган. Шу билан бирга, қимматли қоғозлар портфели деярли ўзгармаган ва тахминан 1,5 млрд доллар даражасида қолган.

Қайд этиш жоиз, захираларнинг камайиши март ойида жаҳон бозорида олтин нархининг тушиши билан боғлиқ. 

Халқаро стандартларга кўра, Ўзбекистон захиралари даражаси жуда юқорилигича қолмоқда. Улар тахминан 17,5 ойлик импортни қоплашга қодир, ваҳоланки, Халқаро валюта жамғармаси томонидан тавсия этилган минимал кўрсаткич 3 ойни ташкил этади.

Эслатиб ўтамиз, жорий йилнинг 1 январь ҳолатида регулятор захираларидаги активларнинг жами қиймати 66,31 млрд долларни ташкил этганди.