АҚШ кемалари, самолётлари ва ҳарбийлари ҳақиқий сулҳгача Эронда қолади – Трамп

АҚШ Президенти Дональд Трамп АҚШ ҳозирча ўз қўшинларини Яқин Шарқдан олиб чиқиб кетишни режалаштирмаётганини маълум қилди. Бу ҳақда у бугун, 9 апрель куни ўзининг Truth Social ижтимоий тармоғидаги саҳифасида ёзди.

Трампнинг сўзларига кўра, барча Америка кемалари, самолётлари ва ҳарбий хизматчилари, шунингдек, “аллақачон сезиларли даражада заифлашган душманни ўта шиддатли таъқиб қилиш ва йўқ қилиш” учун зарур бўлган қўшимча қурол-яроғ, ўқ-дорилар ва бошқа барча воситалар Эрон ҳудудида ва унга яқин давлатларда Эрон ва АҚШ “ҳақиқий келишув” тузгунга қадар қолади.

“Агар бирор сабабга кўра бу амалга ошмаса, бунинг эҳтимоли жуда паст бўлса-да, у ҳолда олдингидан кўра кенг кўламли ва кучлироқ отишма бошланади. Аллақачон келишиб олинган ва бунга зид бўлган барча ёлғон риторикаларга қарамай, ҳеч қандай ядровий қурол бўлмайди ва Ҳормуз бўғози очиқ ҳамда хавфсиз бўлади”, деб ёзди Трамп.

Унинг қўшимча қилишича, ҳозирда Америка армияси шай ҳолатга келтирилган ва дам олиб, кейинги кўрсатмаларни кутмоқда.

Эслатиб ўтамиз, аввалроқ Исроил мудофаа армияси (ЦАХАЛ) матбуот хизмати Эронга зарба бериш тўхтатилишини, бироқ Ливандаги “Ҳизбуллоҳ” аъзоларига ҳужум давом эттирилишини маълум қилган эди.

Ўз навбатида, Эрон сулҳдан кейин Ливанга берилган зарбалар муносабати билан Исроилга қарши жавоб операциясини ўтказиш имкониятини кўриб чиқаётганини билдирди, шунингдек, Исроилни келишув шартларини бузганликда айблади.

Бундан олдин АҚШ ва Эрон икки ҳафталик ўт очишни тўхтатишга келишиб олгани маълум бўлган эди. Дональд Трампнинг сўзларига кўра, Қўшма Штатлар Эрондан музокаралар учун ишчи асос бўлиб хизмат қилиши мумкин бўлган 10 банддан иборат таклиф олган.

Исроилнинг сулҳдан кейин Ливанга ҳужуми ортидан Эрон яна Ҳормуз бўғосини ёпиб қўйди.