“Ўзингни жаҳаннамга юборамиз”. Эрон Трампга кескин жавоб берди

Аввалроқ, АҚШ Президенти Дональд Трамп Эрон 48 соат ичида Ҳормуз бўғозини очмаса, “бутун жаҳаннамни бошига туширишини” ваъда қилганди. Теҳрон эса бу талабни рад этиб, АҚШ Президентининг ўзини “жаҳаннам қаърига юбориш” билан таҳдид қилди.

Эрон ҳукумати АҚШ ультиматумининг муддати икки кун ичида тугашини эслатган Трампнинг баёнотини кескин рад этди. Бу позиция кеча, 4 апрель, шанба куни кечқурун бир нечта эронлик юқори лавозимли раҳбарлар томонидан билдирилган.

Эрон парламентининг миллий хавфсизлик ва ташқи сиёсат қўмитаси раҳбари Иброҳим Азизий Трампнинг сўзларига жавобан Х ижтимоий тармоғида пост қолдирган.

“Эрон сени ва сенинг аскарларингни тўғридан тўғри жаҳаннам қаърига юборади – айнан сизлар доимо муносиб бўлган жойга”, деган Эрон вакили.

Қайд этиш жоиз, 4 апрель куни Дональд Трамп Truth Social ижтимоий тармоғида ўз ультиматумини яна бир бор эслатди. Унинг айтишича, Теҳрон кейинги 48 соат ичида (яъни, 6 апрель) Вашингтон билан “келишувга эришиши” ёки Ҳормуз бўғозидаги блокадани олиб ташлаши керак. Акс ҳолда, Эрон устига “бутун жаҳаннам ёғилади”, дея огоҳлантирган республикачи сиёсатчи.

22 мартга ўтар кечаси ҳам АҚШ Президенти Теҳронга 48 соатлик ультиматум қўйган эди. Ўшанда ҳам Трамп Ҳормуз бўғозидаги блокадани бекор қилишни талаб қилиб, акс ҳолда АҚШ ҳарбийлари Эрон энергетика объектларига зарба беришини билдирган. Кейинчалик эса Трамп Эрон билан музокараларга ишора қилиб, ультиматум муддатини бир неча бор сурган.