Ярим асрлик жиноят. Тед Бандининг яна бир қурбони аниқланди

Америка тарихидаги энг машҳур серияли қотил Тед Бандининг яна бир қурбони аниқланди. Қотиллик 51 йилдан сўнг замонавий ДНК технологиялари ёрдамида фош этилган. Бу ҳақда АҚШнинг Юта штати полицияси хабар берди.

1974 йилнинг 31 октябри, 17 ёшли Лаура Энн Ҳелловен кечасида дугонасининг уйидаги зиёфатдан чиққан ва сирли тарзда ғойиб бўлган. Орадан бир ой ўтиб полиция қизнинг жасадини Форк каньони яқинидаги йўлдан топган.

Терговчилар узоқ вақтдан бери ўша пайтда камида ўттизта қизни ўлдиришда гумонланиб  қамоқхонага тушган Тед Бандини Лауранинг қотили сифатида кўрган. Бандининг ўзи ҳам 1989 йилда Флоридада қатл этилишидан олдин қизни у ўлдирганини тан олган. Аммо қотил ўлим тафсилотларини аниқлаштиришдан бош тортган.

Жорий йилнинг 1 апрель куни Юта округи шерифи Майк Рейнолдс журналистлар иштирокидаги матбуот анжуманида Лаура Эннинг танасидан Тед Бандига тегишли бўлган ДНК намуналарини топганини ва полиция қизнинг қотили Банди эканлигини юз фоиз тасдиқлаган ҳолда жиноят ишини ёпганини маълум қилган.

“Лаура Эннинг танасидан топилган ДНК намуналари Тед Бандиники билан рад этиб бўлмайдиган фоизларда мос келди. Эндиликда бу амалиётдан бошқа ҳуқуқ-тартибот идоралари ҳам Банди ва унга ўхшаш қотилларнинг қурбони бўлган инсонларнинг йиллар давомида очилмай ётган ишларини фош этишда фойдаланишлари мумкин”, дейди шериф Рейнолдс.

2023 йилда Юта штати полиция лабораторияси инсон танасидан ДНК намуналарини ажратиб оладиган янги ДНК технология аппаратини ишлаб чиққан. Қурилма ҳаттоки бир неча одамларнинг ДНКсидан жуда кичик ёки бузилган намуналарни ҳам ажратиб олиши мумкин.

1 апрель куни бўлиб ўтган матбуот анжуманида Лауранинг синглиси Мишел Импала ҳам иштирок этиб, опасининг жиноят иши очилишида ёрдам бергани учун полиция ва ОАВ ходимларига миннатдорлик билдирган.

“Одамлар ҳали ҳам Лауранинг иши билан қизиқишаётгани мени жуда қувонтирди. Биласизми, мен шериф Рейнолсдга ва бу ишда бефарқ бўлмаган барча ОАВ ходимларига оилам номидан чуқур миннатдорлигимни билдираман”, дейди Импала.

Шунингдек, у опаси вафот этганида атиги 12 ёшда бўлгани ва ораларидаги беш ёш фарқга қарамай Импала опаси билан жуда яқин муносабатда бўлганлигини қўшимча қилган.

Маълумот учун, Тед Банди 1970-йилларда ўттиздан ортиқ қизни зўрлаб, ўлдиришда айбланган. Уларнинг кўпчилиги вояга етмаган мактаб ўқувчилари бўлган. У қурбонларини ҳеч ким эътибор бермайдиган жойлар – эски парклар, дарё бўйлари ва шаҳарнинг одам истиқомат қилмайдиган қисмларига олиб бориб ўзининг мудҳиш қилмишларини содир этган. Маньяк ўзининг беозор ва келишган кўринишидан фойдаланиб, қурбонларининг кўпчилиги билан бир неча муддат ишқий муносабатлар ўрнатган ва кейинчалик уларни зўрлаб ўлдирган ҳамда ёш қизларнинг жасадини дарё ва ўрмон четларига ташлаб кетган.

1975 йилда полиция Бандининг машинасидан қўл кишанлари, чанғи ниқоби, арқон, тиғли буюмлар ва қон доғларини топиб, серияли қотилни ҳибсга олган. Суд уни 1974-1978 йиллар давомида ўттиздан ортиқ вояга етмаган қизларни ўғирлаш ва зўрлаб ўлдиришда айблаб, маньякка нисбатан ўлим жазосини тайинлаган. Тед Банди 1989 йилнинг 24 январида Флоридадаги оғир турдаги рецидивистлар сақланадиган қамоқхонада электр стулига ўтқизиш орқали ўлдирилган.

Экстремал қотил тўғрисида 2002 йилда ҳужжатли триллер, 2019 йилда эса Голливуд томонидан “Ахлоқсиз ёвуз ва ёқимтой шайтон” фильмлари суратга олинган.

Ҳожиакбар Муҳаммаджонов