АҚШ Венесуэла муваққат президентидан санкцияларни олиб ташлади

АҚШ расмийлари Николас Мадуро ағдарилганидан кейин унинг ўрнини эгаллаган Венесуэла муваққат президенти Делси Родригесни санкциялар рўйхатидан чиқарди. Бу ҳақда АҚШ Молия вазирлигининг Хорижий активларни назорат қилиш бошқармаси (OFAC) пресс-релизида айтилади.

Родригеснинг исми “алоҳида санкциялар остидаги шахслар” рўйхатидан ғойиб бўлган. Ушбу рўйхатга киритилган шахсларнинг АҚШ ҳудудидаги активлари музлатилади, уларга мамлакатга кириш тақиқланади, АҚШ фуқаролари ва резидентларига эса улар билан ишбилармонлик алоқаларини ўрнатиш ман этилади.

OFAC пресс-релизида бундай қарорнинг тафсилотлари келтирилмаган. Оқ уй эса буни икки давлат ўртасидаги муносабатлардаги илгарилаш белгиси деб атаган.

“Президент Трамп айтганидек, Делси Родригес ўз ишини аъло даражада бажармоқда ва Қўшма Штатлар билан жуда яхши ҳамкорлик қилмоқда. Ушбу қарор икки давлатнинг барқарорликка кўмаклашиш, иқтисодий тикланишни қўллаб-қувватлаш ва Венесуэлада сиёсий ярашувни илгари суриш борасидаги биргаликдаги саъй-ҳаракатларининг натижасини акс эттиради”, дейилади Оқ уй вакили Анна Келли баёнотида.

АҚШ Президенти маъмуриятининг яна бир вакили CBS News телеканалига берган интервьюсида, бу қадам “бизнинг Венесуэла муваққат ҳукумати билан ҳамкорлик қилиш қароримизни ифодалайди”, деб айтган.

Муваққат президентдан санкцияларнинг олиб ташланиши АҚШ ва Венесуэла ўртасидаги муносабатларни нормаллаштиришдаги сўнгги қадамлардан биридир. 

Эслатиб ўтамиз, жорий йил март ойи бошида Дональд Трамп Вашингтон Венесуэланинг ҳозирги ҳукуматини расман тан олганини маълум қилган эди. 30 март куни эса АҚШ Давлат департаменти 2019 йилда ёпилган Каракасдаги Америка элчихонаси етти йилдан сўнг ўз фаолиятини қайта тиклашини эълон қилди.