Кремль Зеленский таклиф қилган Пасха сулҳини рад этди

Аввалроқ, Украина Президенти Владимир Зеленский Пасха байрами кунларида ўт очишни тўхтатишга ва энергетика соҳасида сулҳ тузишга тайёр эканини айтган эди. Бироқ Россия Владимир Зеленскийнинг сўзларида Пасха байрами учун ўт очишни тўхтатиш бўйича аниқ шакллантирилган таклифни кўрмаган. Бу ҳақда бугун, 31 март куни Кремль матбуот котиби Дмитрий Песков журналистлар билан матбуот анжуманида маълум қилди.

“Киев режимига ҳар қандай сулҳ сув ва ҳаводек зарурлиги кўриниб турибди, чунки фронтлардаги динамика... Россия қўшинлари – қаердадир тезроқ, қаердадир секинроқ бўлса-да, бутун фронт чизиғи бўйлаб олдинга силжиётганидан далолат бермоқда”, дейди Песков.

Унинг сўзларига кўра, Зеленский “масъулиятни ўз зиммасига олиши” ва “вақтинчалик сулҳга эмас, балки тинчликка эришиш учун” қарор қабул қилиши керак. 

“Кейинчалик бу қарорни янада қимматроқ бадал эвазига қабул қилишга тўғри келади. Бу ҳақда, жумладан, Президентимиз ҳам бир неча бор таъкидлаган”, дейди Песков. 

Бунгача Зеленский Эрондаги уруш туфайли юзага келган жаҳон энергетика инқирози фонида Киевнинг “шериклари” Россия нефть объектларига зарбалар сонини камайтиришни сўраганини маълум қилган эди. Бунга жавобан Украина Президенти Пасха даврида сулҳ эълон қилишни таклиф қилган.

Шу билан бирга, Зеленский “ҳаётни қадрлайдиган нормал одамлар ўт очишни бир неча кунга эмас, балки бутун умрга тўхтатиш ҳақида гапиришини” таъкидлаган. 

“Аммо биз, шубҳасиз, шаънимиз ва суверенитетимизга дахл қилмайдиган ҳар қандай муросага тайёрмиз”, дейди Украина Президенти.

Эслатиб ўтамиз, Москва ва Киев ўртасидаги энергетика сулҳи шу йилнинг 25 январидан 1 февралигача амал қилган эди. У АҚШ Президенти Дональд Трамп томонидан эълон қилинган бўлиб, сулҳ якунида Трамп Владимир Путин “сўзида тургани” ва қаттиқ совуқ даврида Украина энергетикасига зарба бермаганини айтганди.

2025 йилда Россия Киев билан Иккинчи жаҳон урушидаги ғалабанинг 80 йиллиги ва Пасха байрами муносабати билан бир томонлама сулҳ эълон қилган эди. Бироқ ўшанда амалда ўт очишни тўхтатиш юз бермаган.