“Москва кўз ёшларга ишонмайди” фильми юлдузи вафот этди

Бугун, 25 декабрь куни машҳур совет ва рус актрисаси Вера Алентова – Оскар мукофотига сазовор бўлган “Москва кўз ёшларига ишонмайди” фильми қаҳрамони оламдан ўтди. Россия халқ артисти 83 ёшда эди. Бу ҳақда Пушкин номидаги театр матбуот хизмати хабар берди.

Бунгача Вера Алентова актёр Анатолий Лобоцкий билан хайрлашув маросимида ўзини ноқулай ҳис қилган ва тезкор равишда шифохонага ётқизилган.

“Буюк бахтсизлик юз берди. Вера Валентиновна Алентова вафот этди. У Пушкин театрида 60 йил хизмат қилган. Бизнинг қайғумиз чексиз”, дейилади театр хабарида.

Маълумот учун, Вера Алентова 1942 йилда Архангельск вилояти, Котлас шаҳрида туғилган. 1961 йилда Москвага кўчиб ўтган ва МХАТ мактаб-студиясига Василий Марков курсига қабул қилинган. Шу ерда турмуш ўртоғи Владимир Меншов билан учрашган. 1965 йилда Москва драма театри (Александр Сергеевич Пушкин номидаги) трупасига қабул қилинган ва шу кунгача хизмат қилган.

Актриса кинода кўплаб ролларни ижро этган, машҳурлик эса 1979 йилда эри, режиссёр Владимир Меншов томонидан суратга олинган “Москва кўз ёшларга ишонмайди” фильми билан келган. 1981 йилда ушбу фильм “Энг яхши чет эл фильми” номинациясида Оскар мукофотини қўлга киритган. Шунингдек, у “Эртага уруш бўлади”, “Ширли-Мирли”, “Орзулар вақти” каби бошқа машҳур фильмларда роль ижро этган. Актрисанинг эри 2021 йил ёзида вафот этган.

Эслатиб ўтамиз, аввалроқ ҳиндистонлик актёр ва сиёсатчи – “Зита ва Гита” фильми юлдузи Дҳармендра 89 ёшида вафот этгани ҳақида хабар берилган эди.