“Зита ва Гита” фильми юлдузи вафот этди

Бугун, 24 ноябрь куни ҳиндистонлик актёр ва сиёсатчи Дҳармендра (асл исми – Дҳарам Сингҳ Деол) 89 ёшида вафот этди. Бу ҳақда кинорежиссёр Каран Жоҳар ўзининг Instagram саҳифасида маълум қилди.

Унинг ёзишича, Дҳармендра жорий йилнинг 7 ноябрь куни Мумбайдаги шифохонага ётқизилган. У нафас олишда муаммолар борлигидан шикоят қилган. Кейинчалик актёр шифохонадан чиқарилган. Бироқ ҳозирча унинг ўлими сабаби номаълум.

Маълумот учун, Дҳармендра 1935 йилнинг 8 декабрь куни туғилган. 1960 йилда кино оламида дебют қилган. Унинг фильмографиясида қарийб 300 та роли бор. У “Алибобо ва 40 қароқчи”, “Қасос ва қонун”, “Севишдан қўрқманг”, “Роки ва Рани: Муҳаббат ҳикояси”, “Зита ва Гита”, “Севимли Ража” каби лойиҳаларда роль ижро этган.

Унинг биринчи турмуш ўртоғи Пракаш Каур, Ҳема Малини эса иккинчи хотини бўлган. Биринчи турмушидан унинг иккита ўғли бор: Сунни ва Бобби, иккаласи ҳам муваффақиятли актёрлар. Шунингдек, актёрнинг иккита қизи бор: Вижита ва Ажита. Ҳема Малини билан унинг иккита қизи бор:  Эша ва Аҳана.

Дҳармендра Ҳиндистоннинг учинчи энг юксак фуқаролик мукофоти – Падма Бҳушан ордени соҳиби бўлган. Шунингдек, у ҳинд киноматографиясига қўшган ҳиссаси учун бир нечта йирик мукофотларни олган.

Эслатиб ўтамиз, аввалроқ америкалик таниқли актриса Дайан Китон Калифорнияда 79 ёшида вафот этганди. Актриса “Чўқинтирган ота”, “Энни Холл”, “Уйланган аёллар”, “Бир нарса бериши керак” ва бошқа фильмлардаги роллари билан шуҳрат қозонган.