“Путинни назарда тутган”. Зеленский Рождество табригида номаълум шахсга ўлим тилади (видео)

Бугун, 24 декабрь куни Украина Президенти Владимир Зеленский католик Рождествоси муносабати билан мамлакат аҳолисига видеомурожаат йўллади. Чиқиши давомида у исмини очиқ айтмаган бир шахсга ўлим тилади. Бу ҳақда UNIAN хабар берди.

Нашрнинг ёзишича, Зеленский ўз баёнотида россияликларни “худосизлар” деб атаган, шунингдек, номи тилга олинмаган бир кишининг ўлимини тилаган. Нашрнинг ёзишича, Зеленский бу билан Россия Президенти Владимир Путинни назарда тутган.

“Ва биз ҳаммамиз учун ягона битта тилак тилаймиз: у ўлсин”, дейди Зеленский.

Украинанинг яна бир нашри “Политика” ҳам Зеленский ўз баёнотида айнан Путинни назарда тутганини ёзмоқда.

“Зеленский Рождество табригида украинлар бу кунда битта тилак тилашларини айтди: “У ўлсин”. Президент украинлар кимнинг ўлимини тилашини аниқ айтмаган. Украина каналлари бу билан Путинни назарда тутган, деб тахмин қилмоқда. Шунингдек, у россияликларни “худосизлар” деб атади ва Украинага зарбалар берилаётгани сабабли уларнинг “христианлик ва инсонийлик билан ҳеч қандай алоқаси йўқлигини” айтди”, деб ёзади нашр.

Бу ҳолатда Россия ОАВлари ҳам украиналик ҳамкасбларининг талқинига қўшилган.

Эслатиб ўтамиз, аввалроқ Владимир Зеленский журналистлар билан учрашувда илк бор Украина, АҚШ ва Россия сўнгги икки ой давомида муҳокама қилиб келаётган 20 банддан иборат тинчлик режаси мазмунини очиқлагани ҳақида хабар берилган эди.