Путин Россиясини қўлламаган Меладзенинг Қирғизистондаги концерти бекор қилинди

Россиялик қўшиқчи, Путин Россиясининг Украинадаги босқинига қарши чиққан камсонли маданият ходимларидан бири Валерий Меладзенинг Қирғизистондаги концерти бекор қилинди. Бу ҳақда унинг продюсери Павел Рудченко маълум қилди. 

Унинг фикрича, мамлакат расмийлари санъаткорнинг мамлакатда бўлган вақтида юзага келиши мумкин бўлган ҳар қандай сиёсий шиорлардан қочишга қарор қилган. Меладзе Россиянинг Украинага қуролли ҳужумини ёқламай, 2022 йилда мамлакатни тарк этган. 

Павел Рудченко шунингдек, қўшиқчи Шарқий мамлакатларда чиқиш қилиши тақиқланган санъаткорлар рўйхатига қўшилиши мумкинлигига ишонади. 

Таъкидланишича, Меладзе концертни Марказий Осиё бўйлаб гастроль сафари доирасида ўтказишни режалаштирган эди. Тадбирни ўтказиш учун у Қозоғистон ва Ўзбекистон расмийларига кафолат хатларини ёзиши керак бўлган. У барча зарур ишларни қилган ва ўз мурожаатида “сиёсий ҳаддан ташқари нарсалар”нинг олдини олишга ваъда берган ва бу мамлакатлар халқларига бўлган ҳурмати ва чуқур муҳаббатини билдирган.

Қирғизистон Маданият, ахборот, спорт ва ёшлар сиёсати вазирлиги россиялик қўшиқчи Валерий Меладзенинг Бишкекдаги концерти бекор қилинишига изоҳ берди.

Қайд этилишича, хорижий санъаткорлар ва ижрочиларнинг гастроль ва концерт фаолиятини тартибга солувчи қоидаларга мувофиқ, ташкилотчилар вазирликка барча зарур ҳужжатлар билан бирга олдиндан ёзма сўров юборишлари шарт. Шундан сўнг, санъаткорнинг ўз мамлакатида ва халқаро миқёсдаги обрўси, шунингдек, уларнинг фаолиятининг умум қабул қилинган ижтимоий ахлоқий ва ҳуқуқий нормаларга мувофиқлиги кўриб чиқилади. 

Айни вақтда Валерий Меладзе оиласи билан Испанияда истиқомат қилиб келмоқда. Унинг 2026 йилгача режалаштирилган барча концертлари Россиядан ташқарида бўлиб ўтмоқда ва Россия агентликлари энди унинг чиқишларини, ҳатто, шахсий тадбирлар учун ҳам буюртма қила олмайди. 

Концертлардан воз кечганига қарамай, Меладзе Россияда, жумладан, кўчмас мулк ижараси соҳасида бизнес манфаатларини сақлаб қолмоқда.

Эслатиб ўтамиз, жорий йилнинг 27 ноябрь куни Россия Президенти Владимир Путин Коллектив хавфсизлик шартномаси ташкилоти саммитида иштирок этиш учун Қирғизистонга келиши олдидан Бишкекдаги Украина элчихонаси биноси ва унинг рўпарасидаги кўча орқасида жойлашган Қирғизистон Президенти резиденцияси ўртасига улкан LED-экран ўрнатилиб, дипломатик ваколатхона биноси олди тўсиб қўйилган эди.