Украинада байрам сулҳи. Россия бунга кўнадими?

Украинанинг Рождество байрами муносабати билан таклиф этган ўт очишни тўхтатиш режими тинчлик келишувига эришилишига боғлиқ. Бу ҳақда бугун, 16 декабрь куни Кремль матбуот котиби Дмитрий Песков маълум қилди. 

Украина Президенти Владимир Зеленский кеча, 15 декабрь куни Киев ўт очишни тўхтатиш ғоясини, айниқса Рождество даврида энергетик инфратузилмага зарбаларни тўхтатиш масаласини қўллаб-қувватлашини айтган эди.

“Энди масала, АҚШ Президенти Дональд Трамп айтганидек, биз келишувга ета олиш ёки йўқлигимизда”, дея бу ғояга изоҳ берган Кремль матбуот котиби Дмитрий Песков.

Песковнинг таъкидлашича, агар Украина барқарор ва узоқ муддатли ечим ўрнига “қисқа муддатли, ҳаётга лаёқатсиз қарорлар”га эътибор қаратса, Россия бундай ўт очишни тўхтатишда иштирок этиши эҳтимоли кам.

“Биз тинчлик истаймиз. Украинанинг нафас ростлаб олиши ва урушни давом эттиришга тайёргарлик кўриши учун вақтинчалик танаффусни хоҳламаймиз. Биз бу урушни тўхтатишни, ўз мақсадларимизга эришишни, манфаатларимизни ҳимоя қилишни ва келажакда Европада тинчликни кафолатлашни истаймиз. Биз истаган нарса шу”, деди Песков журналистларга.

Шунингдек, Песков Москва ҳали АҚШ ва Европа расмийлари Вашингтон томонидан таклиф этилгани айтилган НАТО услубидаги хавфсизлик кафолатлари бўйича аниқ таклифлар тафсилотларини олмаганини билдирди.

Эслатиб ўтамиз, кеча, 15 декабрь куни Украина Президенти Владимир Зеленский Берлинда АҚШ делегацияси билан бўлиб ўтган музокаралардан сўнг Россия ва Украина ўртасидаги тинчлик келишуви доирасида ҳудудларни бўлиш масаласида Киев ва Вашингтоннинг позициялари ҳозирча фарқ қилаётганини айтганди.