“Худо уларни аллақачон жазолаган”. “Замҳоким” ногиронларни ҳақоратлади (видео)

Қозоғистоннинг Олмаота вилояти ҳокимининг биринчи ўринбосари Қанат Есболатов ногиронларга нисбатан “Худо уларни аллақачон жазолаган”, жумласини ишлатди ва жамоатчиликнинг кескин норозилигига сабаб бўлди. Бу ҳақда “Nur.kz” хабар берди.

Нашрнинг ёзишича, кеча, 28 ноябрь куни ижтимоий тармоқларда мамлакат Соғлиқни сақлаш вазири Ақмарал Алназарованинг Талгар тумани аҳолиси билан учрашувидан олинган видео тарқалган. Учрашув давомида Олмаота вилояти ҳокимининг биринчи ўринбосари ногиронлар ҳақида гапирган.

“Келинглар, ногиронларни ҳурмат қилайлик, Худо уларни аллақачон жазолаган”, деган у.

Ҳоким ўринбосарининг сўзларини айрим фойдаланувчилар ҳақоратли деб баҳолаган.

“Бу нимани англатади? Аллоҳ жазолаган дегани? Бундай гаплар учун жавобгарликка тортилсин! Мен Қозоғистон фуқароси сифатида Олмаота вилояти ҳокими ўринбосарининг ногиронлиги бўлган шахсларга нисбатан айтган ноўрин сўзларига муносабат билдираман. Бу фуқароларнинг қадр-қимматини таҳқирлашдир ва давлат хизматчиси этикаси ҳамда Конституция нормаларига зид. Текширув ўтказилиши, истеъфо масаласи кўриб чиқилиши ва ҳаммани ранжитган бу сўзлар учун омма олдида узр сўралиши керак деб ҳисоблайман. Ҳар бир инсонни ҳурмат қилиш – адолатли давлатнинг асосидир. Бундай гаплар жавобсиз қолмаслиги керак”, деб ёзмоқда тармоқ фойдаланувчилари.

Шунингдек, мансабдорни ҳимоя қилганлар ҳам бўлган.

“У бошқача маънода айтмоқчи бўлгандир. Кўринишидан, таржима ёки иборани шакллантириш жараёнида фикрни охиригача тўғри етказмаган, шунинг учун нотўғри тушунилган. Аслида у уларнинг дардини тушунишини, ҳеч кимга бундай оғир вазиятни раво кўрмаслигини айтмоқчи бўлган. Контекстга қараганда, у қўллаб-қувватлашни истаган, фақат фикр нотўғри жаранглаган. Шунинг учун бўлмаган жойдан салбийлик изламайлик. Муҳими – ният ва мазмунни кўра билиш”, деб ёзган фойдаланувчилардан бири.

Қанат Есболатовнинг ўзи ҳам сўзларига изоҳ берган. Унинг айтишича, Талгардаги учрашувга жуда кўп одам тўпланган. Ҳар бири долзарб мавзуларни кўтарган ва савол беришга шошилган. Навбат катта бўлган.

Учрашув учун регламент бўйича икки соат ажратилган бўлса-да, саволлар кўплиги сабабли у тахминан тўрт соат давом этган. Одамлар орасида ногиронлиги бўлган шахслар ҳам бўлган. Баъзилари навбатини кутиб тик турган. Навбат етганида эса залда ўтирган бир нечта одам уларнинг гапини бўлиб, саволларига халақит берган.

“Мен регламентга риоя қилишни сўрадим. Аммо мен русча гапирганда хатолар бўлади. Фикрни нотўғри етказиб қўяман. Мен аслида: “Худо катта синов берган”, демоқчи эдим”, дейди Олмаота вилояти ҳокимининг биринчи ўринбосари.

У бу ҳол учун чин дилдан узр сўраган. Мансабдорнинг айтишича, йирик тадбирларда аввало кексалар ва ногиронлиги бўлган шахсларга навбат бериш муҳим. Улар узоқ кутмаслиги керак.

Қанат Есболатов жорий йилнинг ноябрь ойи бошида Олмаота вилояти ҳокимининг биринчи ўринбосари этиб тайинланган.