Киевдаги шимолий кореялик асирлар ўзларини Сеулга топширилишини сўради

Украинадаги икки нафар шимолий кореялик ҳарбий асир Жанубий Кореяга ўтказилишини сўради. Бу ҳақда бугун, 2 ноябрь куни Жанубий Кореянинг инсон ҳуқуқлари ташкилотига таяниб, AFP хабар берди.

Бу сўров Gyeore-eol Nation United инсон ҳуқуқлари фаоллари томонидан мувофиқлаштирилган ҳужжатли фильм учун интервью пайтида билдирилган.

Интервью 28 октябрь куни Киевда ёзиб олинган бўлиб, у ерда Россия Қуролли кучлари томонида жанг қилган икки шимолий кореялик аскар Украина томонидан асирга олинганидан кейин ҳибсда сақланмоқда.

Жанубий Корея ва Ғарб разведка агентликларининг маълумотларига кўра, 2024 йилда Россияни қўллаб-қувватлаш учун тахминан 10 000 Шимолий Корея аскари Украинадаги урушга юборилган.

Жанубий Корея разведка маълумотларига кўра, Шимолий Корея аскарларига қўлга олинмаслик учун мунтазам равишда ўз жонига қасд қилиш буюрилади ва, хусусан, яраланган тақдирда, улар гранаталарни портлатади. Жанубий Корея разведкаси сентябрь ойида Украинадаги жангларда тахминан 2000 Шимолий Корея аскари ҳалок бўлганини маълум қилди.

Россия ва Шимолий Корея ўртасидаги ҳамкорлик Россиянинг Украинага тўлиқ миқёсда бостириб кириши бошланганидан бери кучайди. Пхеньян Россияни ҳарбий тажовузида қўллаб-қувватлайди. Шимолий Корея қўшинлари Россия армияси томонидан қўшни давлатга қарши олиб борилаётган ҳарбий операцияларда иштирок этади. Бундан ташқари, Шимолий Корея Россияга мигрант ишчиларни юборади ва уни қурол-яроғ билан таъминлайди.

Жанубий Корея ва бир қатор Ғарб мамлакатларидаги разведка агентликларининг маълумотларига кўра, Шимолий Корея Россияга артиллерия снарядлари ва ракеталарини ҳам етказиб беради, улардан Москва Украинага ҳужум қилиш учун фойдаланади. Бунинг эвазига Пхеньян Россиядан техник маслаҳатлар олади, жумладан, сунъий йўлдошларни учириш бўйича.