АҚШ Исроилни сулҳга риоя қилишга мажбурлаши керак – Эрдўған

Туркия Президенти Ражаб Тойиб Эрдўғаннинг айтишича, АҚШ ва бошқа давлатлар Исроилни Ғазо бўйича оташкесим келишувини бузишни тўхтатишга мажбур этиш учун кўпроқ чоралар кўриши лозим, бу санкциялар жорий этиш ёки қурол-яроғ савдосини тўхтатишни ҳам ўз ичига олиши мумкин. Бу ҳақда Эрдўған минтақавий Кўрфаз давлатларига қилган сафаридан қайтиб келаётганида журналистларга маълум қилди.

НАТО аъзоси бўлган Туркия Ғазога қилинган Исроил ҳужумларининг энг қатъий танқидчиларидан бири бўлиб оташкесим бўйича музокараларда воситачи сифатида фаол иштирок эта бошлади. Бу фаоллик ўтган ойда Эрдўған билан АҚШ Президенти Дональд Трампнинг Оқ уйдаги учрашувидан кейин кучайди.

“Туркия ўлароқ, биз оташкесимни таъминлаш учун қўлимиздан келган барча ишни қилмоқдамиз. ҲАМАС оташкесимга риоя қилмоқда, ҳатто бу борада очиқ баёнот ҳам бермоқда. Аммо Исроил оташкесимни бузишни давом эттирмоқда. Халқаро ҳамжамият, айниқса, АҚШ, Исроилнинг келишувга тўлиқ риоя этишини таъминлаш учун кўпроқ ҳаракат қилиши керак. Исроил ўз ваъдаларини бажаришга мажбур қилиниши лозим – санкциялар орқали ёки қурол-яроғ сотишни тўхтатиш йўли билан”, деди Эрдўған.

Анқара маълум қилганидек, у оташкесимни амалга оширишни назорат қиладиган “ишчи гуруҳ” таркибига қўшилишга тайёр. Туркия қуролли кучлари заруратга қараб ҳарбий ёки фуқаролик вазифасини бажариши мумкин ва мамлакат Ғазони қайта тиклаш жараёнида фаол роль ўйнашни режалаштирмоқда.

Исроил Бош вазири Биньямин Нетаняху 22 октябрь куни Ғазо секторида турк хавфсизлик кучларининг иштирок этишига қарши эканлигини билдирган. Нетаньяхунинг бу фикри ҳақида сўралганда, Эрдўған одатдаги танқидий баёнотларидан тийилди ва Ғазодаги “майдонда” иштирок этиш бўйича аввалги қатъий позициясини юмшатиб, музокаралар ҳали давом этаётганини айтди.

“Ғазода ишлайдиган ишчи гуруҳ ҳақида музокаралар давом этмоқда. Бунинг тартиби ҳали аниқ эмас. Бу кўп қиррали масала бўлгани учун, муҳокамалар ҳам кенг қамровли бўлмоқда. Биз Ғазога ҳар қандай кўмакни беришга тайёрмиз”, деди у.

Шунингдек, Эрдўған илгари айтган фикрини такрорлаб, энди Кўрфаз давлатлари Ғазони қайта тиклаш учун молиялаштиришда фаол иштирок этиши кераклигини таъкидлади. Унинг сўзларига кўра, бу вазифани ҳеч бир давлат ёлғиз бажара олмайди.

Исроил ва Туркия ўртасидаги аввалги муносабатлар Ғазо уруши даврида ёмонлашди, Анқара Нетаньяху ҳукуматини геноцид содир этишда айбламоқда, Исроил эса бу айбловларни қатъиян рад этган.