Россия Украинага кенг кўламли ҳужум уюштирди. Қурбонлар бор (видео)

Бугун, 22 октябрга ўтар кечаси Россия кучлари Украинага яна кенг кўламли дрон ҳужумларини уюштирди. Ҳужум оқибатида 2 нафар тинч аҳоли ҳалок бўлди. Бу ҳақда Украина Президенти Владимир Зеленский Telegram-каналида ёзиб қолдирди. 

Маълум қилинишича, пойтахт Киевда икки киши ҳалок бўлган, 17 киши жароҳат олган. Ҳалок бўлганлардан бири бири Днепровск туманидаги кўп қаватли уйлардан бирида юзага келган ёнғин оқибатида вафот этган. 

Киев ҳарбий маъмурияти раҳбари Темур Ткаченко ахборотига кўра, Печерск, Днепровск, Дарница, Деснянск ва Соломенский туманларида талофотлар қайд этилган. Ҳужумлар сабаб пойтахт ва вилоятда фавқулодда электр ўчишлари жорий этилган, Днепропетровск вилоятида ҳам электр таъминоти узилган. 

Украина Энергетика вазирлиги мамлакат энергетика инфратузилмасига қаратилган оммавий ракета ва дрон ҳужумлари туфайли электр таъминоти фавқулодда тартибда деярли барча ҳудудларда ўчирилганини билдирган. 

Запорожье вилояти ҳарбий маъмурияти раҳбари Иван Федоровнинг сўзларига кўра, вилоятда 13 киши жароҳатланган. Шаҳарнинг турли ҳудудларида 15 та кўп қаватли уй, хонадонлар ва нотураржойларга зарар етган.

Одесса вилоятининг Измаил шаҳрида дронлар энергетика ва порт инфратузилмасига зарба берганини вилоят раҳбари Олег Кипер тасдиқлаган. Унинг сўзларига кўра, жабрланганлар қайд этилмаган, энергия таъминоти тикланмоқда.

Эслатиб ўтамиз, аввалроқ Доғистон Республикасидаги корхоналардан бири Украина дронлари томонидан ҳужумга учрагани ҳақида хабар берилганди.