Андижонда “шантажчи” эркак қўлга олинди

Андижон вилоятида ўзи билан ишқий муносабатда бўлган аёлнинг расм ва видеоларини ижтимоий тармоқларда тарқатмаслик эвазига пул талаб қилган эркак қўлга олинди. Бу ҳақда вилоят ИИБнинг матбуот хизмати хабар берди.

Аниқланишича, Андижон вилоятининг Шаҳрихон туманида яшовчи эркак шу туманда яшовчи аёл билан ишқий муносабатда бўлади. Кейинчалик эркак аёлдан пул талаб қилиб, агар айтилган миқдордаги пулни бермаса, у билан ёзишган суҳбатлар тарихи, расм ва видеоларни ижтимоий тармоқларда тарқатиш билан таҳдид қилади.

Ҳуқуқни муҳофаза қилувчи органлар томонидан ўтказилган тезкор тадбирда эркак айтилган миқдордаги пулларни олган вақтда, ашёвий далиллар билан қўлга олинган.

Қўлга олинган эркак товламачилик, сир сақланиши шарт бўлган маълумотларни ошкор қилиш ва аёлни шарманда қилиш билан қўрқитиб, унинг мулкини беришга мажбур қиладиган ҳолатга солгани учун унга нисбатан Шаҳрихон тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 165-моддаси 1-қисми билан жиноят иши қўзғатилган.

Эслатиб ўтамиз, аввалроқ Бухоро вилоятида собиқ севгилисидан улар ўртасида бўлган ишқий муносабатни ошкор қилмаслик учун 30 минг доллар талаб қилган аёл қўлга олинган эди.

Бунёд Келдибоев