Путин Трампга мукофот бермаган Нобель қўмитасини танқид қилди (видео)

Бугун, 10 октябрь куни Ослода жойлашган Норвегия Нобель қўмитаси 2025 йилдаги Тинчлик бўйича Нобель мукофоти лауреатини эълон қилди. Бу мукофотга кўпдан бери даъво қилиб келаётган АҚШ Президенти Дональд Трамп эмас, балки венесуэлалик сиёсатчиси аёл Мария Корина Мачадо эди. Россия Президенти Владимир Путин эса Душанбедаги матбуот анжуманида журналистнинг саволига жавоб берар экан, Нобель қўмитасини танқид қилди.

“Шундай ҳолатлар бўлганки, Нобель қўмитаси тинчлик мукофотини умуман тинчлик учун ҳеч нарса қилмаган одамларга берган. Ва, менинг фикримча, ана шундай қарорлари билан улар бу мукофот нуфузига улкан зарар етказишган. Қарангки, одам келади – яхши ёки ёмон – унга бир ой, икки ой ўтиб, тарс, мукофот. Нима учун? Ҳа, умуман ҳеч нарса қилмаган ҳолда. Ахир бу қандай иш? Бу мукофот қандайдир хизматлар учун берилиши керак-ку. Шу боис, менимча, унинг нуфузи анча даражада йўқолган”, деди Россия Президенти.

Путин Трампнинг Нобель мукофотига лойиқми ёки йўқлигини билмаслиги, лекин у ҳақиқатан ҳам йиллар, балки ўн йиллар давомида чўзилиб келаётган мураккаб инқирозларни ҳал қилиш учун жуда кўп иш қилаётганини таъкидлади.

“Мен аниқ айтганман, биламан: Украинадаги инқироз бўйича у чин дилдан ҳаракат қилмоқда. Нимадир қўлдан келди, нимадир келмади. Балки Анкориждаги келишувлар ва муҳокамалар асосида яна кўп нарса қилишимиз мумкин бўлар. Лекин у бу масалалар – тинчликка эришиш ва халқаро мураккаб вазиятларни ҳал этиш масалалари устида чиндан ҳам ишлаяпти, ҳаракат қилаяпти. 

Энг яққол мисол – Яқин Шарқдаги вазият. Агар Дональд интилаётган ва айтаётган, амалга оширишга уринётган барча ишлар якунига етказилса – бу тарихий воқеа бўлади, бу шунчаки тарихий воқеа”, деди Путин.

Шунингдек, у кеча, 9 октябрь куни Ироқ Бош вазири Муҳаммад Судани билан гаплашиб, ҳатто Россия ва Араб давлатлари Лигаси учрашувини ҳам кейинга қолдиришга келишганини, бу унинг ташаббусим бўлганини айтди. 

“Мен буни айнан ҳозир Яқин Шарқда, умид қиламизки, йўлга қўйилган ва Трамп ташаббуси ва бевосита иштирокида кетаётган жараёнга халал бермоқчи эмаслигим учун қилдим. Бу ютуқ эмасми? Бу – ютуқ.

Лекин яна такрорлайман: у бу мукофотга лойиқми-йўқми ёки мукофот бундай ютуқларга лойиқми-йўқми – буни мен ҳал қилмайман”, деди Россия Президенти.

АҚШ Президенти Дональд Трамп эса Truth Social ижтимоий тармоғида Владимир Путиннинг Нобель тинчлик мукофоти ҳақида гапираётгани акс этган видеони жойлаб, Россия Президентига миннатдорлик билдирди.

Маълумот учун, Трамп бир неча бор ўзини мукофотга лойиқ деб ҳисоблашини, “етти урушни тугатганини” ва унинг мукофотланмаслиги “АҚШ учун ҳақорат” бўлишини таъкидлаган. Ўзбекистон Президенти Шавкат Мирзиёев ҳам жорий йил 23 сентябрда БМТ қароргоҳида бўлиб ўтган учрашувда Дональд Трампнинг тинчлик бўйича Нобель мукофотига муносиб эканини айтганди.