Зеленский Путин билан Қозоғистонда музокара ўтказишга тайёрлигини айтди (видео)

Украина Президенти Владимир Зеленский Россия билан эҳтимолий музокаралар олиб бориш жойи ҳақида фикр билдирди ва Қозоғистонда ҳам учрашув ўтказишга тайёрлигини айтди. Бу ҳақда Украина раҳбари “Fox News” телеканалига берган интервьюсида сўз очди.

Давлат раҳбари журналистнинг саволига жавобан Россия Президенти Владимир Путин билан учрашувга розилигини тасдиқлаган. Шу билан бирга, у Москвага бориб музокара ўтказолмаслигини, аммо бошқа вариантларга очиқлигини таъкидлаган.

“Биз учрашув учун турли жойларни таклиф қилдик – Туркия, Саудия Арабистони, Қатар, нейтрал Европа мамлакатлари, масалан, Австрия ёки Швейцария. Агар хоҳиш бўлса, Қозоғистонда ҳам учрашиш мумкин”, деган Зеленский. 

Унинг қўшимча қилишича, Россия Президенти Владимир Путин учрашувлардан бош тортиб, урушни давом эттиришни маъқул кўрмоқда.

У ташаббуслар фақат Украина томонидан эмас, балки АҚШ Президенти Дональд Трамп, Европа раҳбарлари, жумладан, Франция Президенти Эммануэль Макрон ҳамда Туркия Президенти Ражаб Тойиб Эрдўған томонидан ҳам илгари сурилганини алоҳида урғулаган. 

Давлат раҳбарининг билдиришича, Путин урушни кенгайтиришга интилмоқда ва нафақат Украинада, балки бошқа ҳудудларда ҳам давом эттириши мумкин. 

“Улар давом эттиришларини кўрсатмоқчи. Шу сабабли у ҳар қандай учрашувларни: икки томонлама ёки кўп томонлама бўлсин барчасини ортга сурмоқда”, деган Украина Президенти. 

Қайд этиш жоиз, Россия Президенти Владимир Путин Хитойга ташрифи якунлари бўйича матбуот анжуманида Зеленский Москвага келса, учрашув ўтказиши мумкинлигини билдирганди.

Украина Ташқи ишлар вазири бу фикрга жавобан Путинни “қабул қилиб бўлмайдиган шартлар қўйиб, манипуляция қилиш”да айблаган.

Кейинчалик Зеленский Париждаги матбуот анжуманида ҳам Путиннинг таклифига муносабат билдириб, Москвада учрашишни рад этган.

Эслатиб ўтамиз, аввалроқ Украина Президенти Владимир Зеленский Нью-Йоркда Қозоғистон Президенти Қосим-Жомарт Тўқаев билан учрашганди. Мулоқот чоғида икки давлат раҳбарлари иқтисодий ва гуманитар соҳалардаги ҳамкорлик масалаларини муҳокама қилган. Владимир Зеленский Украина ҳудудидаги вазият юзасидан ўз қарашларини баён қилган.